عبدالله...عبدالله...مهدك يتانيك

بسهم الكدر...شفت النحر...مذبوح
ظليت أون...دمع الجفن...مسفوح
افراقك صعب...ذاب القلب...و الروح
روحي إلك...تتأملك...و اتنوح
يوليدي مو بيدي أصرخ و أناديك

اشظل بالعمر...من الصبر...مليت
دمعي يهل...حن الإبل...حنيت
تاه الفكر...ليك أنتظر...ظليت
حيلي انفقد...خالي المهد...ناديت
أتمنه...تتعنه...و ترجع و أناغيك

قلبي انصدع...حين انقطع...نحرك
حيف ووسف...يبني انحسف...بدرك
ظليت أعد...عمر الورد...عمرك
ظل يلتهب...يطفه و يشب...جمرك
عين أمك...من دمك...تجري و تواسيك

اشما تبتعد...لا تعتقد...أنساك
بوادي الحزن...ريت أندفن...وياك
فكري انذهل...سهم الأجل...وافاك
قوز الألم...صابك سهم...و ارماك
آه يبني...صوبني...سهم اللي راميك

لمن غبت...ما حسّبت...هالحال
و لا جنت أظن...فقد الابن...جتّال
ابهاي المحن...نال الزمن...ما نال
صب الخصم...جور و هضم...و أهوال
مهضومه...و مهمومه...و قلبي انفجع بيك

من حرمله...اشمتحمله...من اهموم
بجور الوكت...دمعي يكت...ادموم
وين أتجه...و انطي الوجه...هاليوم
يالمنخضب...و من العذب...محروم
ما أقدر...أتصبر...مستاحشه اعليك

بقلبك جرح...يالمنذبح...عالماي
سهم الغدر...تارك جمر...بحشاي
تالي العمر...يصفه اليسر...ممشاي
متحيره...و متيسره...اويه اعداي
اشبدية...مسبية...أطلع و أخليك