حته لو ما عندك اجفوف...يخويه انريدك
حته لو ما عينك اتشوف...يخويه انريدك
تدري يا راعي العلم...رايتك ستر الخيم
ما هو من طبعك و أحلفنك تقوم النخوتي...اعليك خوية بضلع أمي اليوم احضر محنتي
عوف جفينك و جودك قوم ساند وقفتي...أكتفي بخيال منك بس أشوفه بخيمتي
من أشوفك بين الخيام...تأمن روحي
ظلك ايغطي هالأيتام...تأمن روحي
وداعتك يبو الشيم...رايتك ستر الخيم
لايذه الأطفال بيه و آنا عيني اعله النهر...وين أدورن وجهي بعدك خايفة و خدري بخطر
اشلون أقول انخيت أخويه سمع مني و ما حضر...ايصير أقولن للنشدني كفل زينب و اعتذر
خويه انت الخيمتي اعمود...يرافع بيتي
لا تطيح بقطع الزنود...يا رافع بيتي
اشلون لو بيتي انهدم...رايتك ستر الخيم
حالتي أهون يخويه لو شفت حال الحسين...حاير بدربين عقبك انت وين وهوه وين
عين تربي للشريعة للخيم و أطفاله عين...و آنا مثله و حالي حاله حايرة ابين الأثنين
إيد يصفقها عله الأيد...يخويه إقبالي
المثلي يفقد مثلك اعضيد...يخويه إقبالي
اشعدنه أكبر من ألم...رايتك ستر الخيم
يا قمر ما عودتني وحدي ما آخذ قرار...و لا بعد عيني اقتلتها عله درب الإنتظار
من الخيم حد الشريعة هالدرب مفروش نار...اشلون تنهض لي و تنجيني ابلا يمين ولا يسار
يا قمر ما أريدن الماي...أريد اوجودك
رايده بس توقف اوياي...أريد اوجودك
بس تشوفك هالحرم...رايتك ستر الخيم
امنين أجيلك يا بو فاضل خايفة و ما عندي راي...و عسه محد يشتكيلك من العطش و اتجيب ماي
شوف هالأطفال عقبك لايذه كلها بذراي...بس أنا بيمن ألوذ الفاقدة مثلك حماي
من النهر يا با الفضل قوم...أصيح ادخيلك
من قبل ما تهجم القوم...أصيح ادخيلك
يدري الصابك سهم...رايتك ستر الخيم
حيرتي باجر يخويه من أظل ابلا كفيل...لو جبرني القطع جفك لازم أمشي اوياه و أشيل
منهو ليه ابهالضعينه بين شامت و يعيل...و يا هضيمة حالي بعدك لو مشيت اعله الهزيل
النار لو تسعر بالأطناب...منو يطفيها
بنار فقدك هالقلب ذاب...منو يطفيها
يا كفيلي و الأهم...رايتك ستر الخيم
