ريت السافر ايعود...ما جرحّت الخدود
يوم الودع وراح...صرت من الحزن عود
جيت امن الوداع و ها يريت اعيوني عميات...مره ابخوف أضيع و أعثر و مره بالدمعات
درب الماخذك حته الهوه حسيته بيه مات...تدري اشقد خذت من عمري يا بويه هاللحظات
لو ميته و لا جيت...آه يا وحشة البيت
بعدك جم جرح صاح...صرت من الحزن عود
كل ليله التمر عبدالله چني الصوته أسمع...أوقع و أركض و جفيني قوه البابي تدفع
تدري بغيبتك ببنيتك كل مرض يطمع...و بحسره و دمع لفراشي يا محبوبي إرجع
بس حيطاني يمي...محد يحجي بِسمي
ظلت بس الأشباح...صرت من الحزن عود
ناسيته المرض وي ما رحت بس علتي انته...لحظة خطوتك من باعدت حل موتي سكته
من عندي الذنب من صافحت جفك و عفته...بس لو عاودت متسافر إلا و آني ميته
أدري اعتابي أذاه...لو ماخذني وياه
ليش بدمعي يرتاح...صرت من الحزن عود
ما ريد الهوه شهقاتي بيه يا والدي اتزيد...و آنا الموت أريده و غير لا صدقني ما ريد
عمري ابلا قمر و بلايه عبدالله و لا يفيد...دينه و بس مصايب و الدموع و صفقت الإيد
كل لحظه بإسمهم...أنده و أركض إلهم
راحوا و الدهر ناح...صرت من الحزن عود
دوم من الشمس لو حل صبح أنخاها ترحل...و أعرف هالشمس يحسين إلك وين انت تندل
من أشتاق إلك و بصدري ميظل هوه تقبل...راح اوياج ادز صوره إلي بس خوفي يزعل
ما يعرفني لو شاف...وجهي من الدمع جاف
بعده يكسر اجناح...صرت من الحزن عود
صدرك بويه ذاك الدافي خوفي بخيل ينداس...وصفوا كربله و ناس النوت حربك و لا ناس
فكري اتزاحم بصورة عطش و اجفوف عباس...و أعرف حالي زين و عمري ما وهه من الإحساس
خوف البيه مجنون...يا رب ما يشوفون
شر و ياخذ أرواح...صرت من الحزن عود
معقولة أنجرح و إحساسك أعرف بيه يدري...أعتب بويه خوفي و انت نحرك دمه يجري
هم إحساسي فز يا رب دخيلك شنو يجري...ليش ابجف أحس اصبع وقع و انسحق صدري
حزن العندي ميغيب...جرح البيه ميطيب
جرحه ابلايه جراح...صرت من الحزن عود
