ليلة العاشر...كلشي ظل حاير
ظهري باجر ينكسر...ظهري باجر ينكسر

الليله ما تشبها ليله الليله متروسه حزن...الليله عرش الله أسمعه من الموادع يون
بيها وجه الخوف دمعه اتزاعلت ويه الجفن...ليلة عاشر مصيبه تسحن بقلبي سحن
ليلة الفرقه...جفني ما أطبقه
ظهري باجر ينكسر...ظهري باجر ينكسر

هاكم اعلوم المدامع و المعاتب و السهر...كلشي يتحرك الليله صافن بوجهه الدهر
الليله بيها مصحف الله يوزع آيات و سور...ريت مو باجر الليله قبري بجفوفي انحفر
آنا بت حيدر...باجر أتعثر
ظهري باجر ينكسر...ظهري باجر ينكسر

امبارك العريس كافي كافي لتقلوله...باجر القاسم نزفه ابدمعه مو هلهوله
جني أشوفن هالسيوف اتغازلت وي طوله...يا سيوف ابكل مسيه ذمتج مشكوله
قدوة الشبان...للرمح عطشان
ظهري باجر ينكسر...ظهري باجر ينكسر

الليله ليله اتودع ابنها بالمدامع تحتفي...و ابتسامات المشاعر من وجهها تختفي
باجر من ايروح ابنها باللطم ما تشتفي...اتصير من الحزن جمره للحشر ما تنطفي
تكتب بإيدي...رايده اوليدي
ظهري باجر ينكسر...ظهري باجر ينكسر

الليله يم خيمة أخويه ادموعي كلها أبجيها...الخوه من بعد أبو فاضل كل طعم ما بيها
لاقت اعليه الكفاله و هو لاق اعليها...أرد أقله من تروح الحره من يحميها
لو وقع جفه...أوقع ابصفه
ظهري باجر ينكسر...ظهري باجر ينكسر

بخيمة القرآن سكنه تقره برسوم النحر...اشلون لو تشوف المنحر بسيف انطبر
العالم بساعتها يصفر و القدر يرثي القدر...ووردة الدنيه رقية اتصير دمعه امن القهر
وردة أيامي...اتموت قدامي
ظهري باجر ينكسر...ظهري باجر ينكسر

الليله وجه الدنيه خايف و السمه اتسولف تعب...يمكن الليله التجينه أحله من هسه التعب
لا أخو لا خيمه عندي باجر ايصير العجب...ألف يا وسفه التراب ايدمر اخدود الذهب
أنصب اعله التل...مأتم المقتل
ظهري باجر ينكسر...ظهري باجر ينكسر