يقارورة دمه الغالي...عله أحبابي انشغل بالي
أراقب و آني حذره...الرسايل كلها خطره
أول مراسيل الحزن نسمه هوه جايبته لي...مخنوق إجه بصدري النفس شميته بيه ريحة هلي
من والدي جايب عطر مو ذاك عطره الأولي...بيه ريحة فاقد ولد يمكن مشه الأكبر علي
يقاروه و أخاف آني...تجرحيني بخبر ثاني
و اموتن قطره قطره...الرسايل كلها خطره
ثاني رساله امن السفر مكتوبه لي بقطرة دمه...قالت لي عطشان الورد مات النده و يشرب ضمه
عبدالله مو ذاك الطفل جن والدج شايل سمه...أترف قرابين العشق راد الحبيبه ايقدمه
رسمتي لي يقاروره...مهد خالي بحضن صوره
و أثر دم اعله صدره...الرسايل كلها خطره
ثالث مكاتيب البعد هذا أصعب و أكثر خطر...يحجي لي سالوفة سمه مثلومه و يطيح القمر
من يحضن بروحه الجرف يشبه نهر حاضن نهر...مو ظهر أبويه المحني ظهر الزمن كله انكسر
لقاه كاتب عله اجروحه...غلاة أخته مثل روحه
و طلب زينب تعذره...الرسايل كلها خطره
أما الرساله الرابعه لونج يقاروره اختلف...لون الدمه اتحول إلى حنة عريس ابلايه جف
والدته ينزف رادته زفوه عله اجروحه و نزف...صورة بدر ينزف ضوه صورة الإحساس ورجف
و أنا و روحي و حناجرها...مثل رمله و مشاعرها
الحجر بالنوح أفطره...الرسايل كلها خطره
لحظه ووصل من الهجر أصعب مراسيل الألم...شكلج يقاروره اختلف صار أسود وقلبي انصدم
مستغربه و فكري انذهل حزنج عله ارموشي انرسم...ليل الله بأحضانج نزل لو هذا دخان الخيم
جمر غربه و حرق خيمه...و أنا بعيني الدمع غيمه
مطر و اخدودي صحره...الرسايل كلها خطره
آخر رساله من النحر قلبت موازين الزمن...قارورة الدم امتلت و اتبدت و فاض الوطن
صدرك عليه حافر فرس و الخد بالرمال اندفن...وصفولي بجروحك شمس و اجروحي ما يتوصفن
عله اجروحك قمر غافي...وأنا بروحي النجم طافي
و طفه العالم بأسره...الرسايل كلها خطره
خلصت رسايلكم هلي و ما خلصت بروحي الحرب...و اتخيلت رحلة سبي مخطوره و ابعيد الدرب
زينب تصد اعله الرمح تلقه الرمح شايل قلب...و آنا أسمع بروحي صده صوت المتن من ينضرب
سكينه أختي جرح بيها...و رقيه ابلا تراجيها
وبجن وحده اعله الأخره...الرسايل كلها خطره
