قلب مجروح خليته بين ايديه...صحت رحماك يا رب البريه
إلك دعوة غريبه...علي سالم تجيبه...قلب مجروح

دعاء الأم إذا عندك قلت مسموع...مثل لوعة طفل قلبي تسمعه ايلوع
عدد عمري العلي ابني علقته اشموع...حبست بناظري اشعندي المصابه ادموع
أناجيك بنفس ساعه و يرد مقطوع...أشوف بيا صبر جبدي برمح مرفوع
قسمت اعليك بحسين و مصابه...حلم دنياي تحفظ لي شبابه
إذا منك قريبه...علي سالم تجيبه...قلب مجروح

علي اعيوني الثنين و لو وقع ما شوف...أدور اعليه و اشمنه بقلب ملهوف
مثل طبع الفراشه اعله الضوه من اتطوف...مشه عني و جنت بين الأمل و الخوف
و أباوع للعساكر إجت ليه اصفوف...و آني بخيمتي و أدعي بدمع مذروف
و أقول اشلون من يشتد حنيني...أخاف حسين لا يسمع ونيني
و أنا بحاله رهيبه...علي سالم تجيبه...قلب مجروح

وحق حمل الشهور التسعه و الآهات...إذا راح الولد وجهه بضميري ايبات
و يا عين اليمرها النوم بالحسبات...سهام النايبه و حُسّادي و الشمات
عسن نهر الفرات انقطع مايه و مات...و الأكبر ما أشوف اشفايفه امخشبات
لونها ادموع بعيوني رويته...وداعي اوياه كل دمعي بجيته
جمر قلبي بلهيبه...علي سالم تجيبه...قلب مجروح

قعدت اقبال مهده وشكثر هزيت...عله طور المحنّه اشقد إله لوليت
علي ايحرسك علي لمن طلع ناديت...علي يبني عساني الكربله ما جيت
شلت طارف الخيمه و من بعد صديت...صحت يوليدي روحي اترد لون رديت
أقولن راح لو أصبر و أتاني...و لو غدار ما يرحم زماني
و إذا يرحم عجيبه...علي سالم تجيبه...قلب مجروح

يروحي هالوحيّد من ايديه ايروح...انمرد قلبي يغالي اعله الجروح اجروح
مثل صورة محمد وجهه من ايلوح...و أشم عطر البتول ابعطر جسمه ايفوح
عزيز و غالي ابني و أعز من الروح...و لا أقدر أشوفه اعله الثره مذبوح
مثل مصباح و يضوي اعله بيتي...لون تنباع أشريها منيتي
نبض قلبي و حبيبه...علي سالم تجيبه...قلب مجروح

أبوك الخيمتي رد ابجدم يعثر...يليله يصيح قومي استقبلي الأكبر
رحت أركض و حسرة واله أتحسر...على جر النفس من خوفي ما أقدر
هويت اعليك أقبلك و أشتم المنحر...و لا ظل كتر سالم كلك اموذر
شعوري اشلون و آنا أسمع وينيك...أصيح اشلون يبني امقطعينك
صحت بأعظم مصيبه...علي سالم تجيبه...قلب مجروح

يوردة كل صبح من غبشه أشتمك...يضي العين فك عينك يبعد أمك
زينب عمّتك يبني إجت يمك...سكينه وي رقيه تمسح ابدمك
عسن ضمني القبر من قبلما ضمك...جرح هم غربتي يبني و جرح همك
يريت اوياك وافتني المنيه...يهون اعليك تمشي أمك سبيه
يسموني النجيبه...علي سالم تجيبه...قلب مجروح