يا بو الأكبر نظل وفايه...و احنه كل عام نجي مشّايه

احنه و العباس ما نخلف وعد...مثل عهد الشاكري عدنه عهد
كلها فدوه اتروح حته البلمهد...بس رضاه و ما نريد أكثر بعد
أول احجايه و أخير احجايه...و احنه كل عام نجي مشايه

هاي خطوات المحب بالأربعين...هُمه ما يمشون بس المؤمنين
هالشعائر صارت إلنه دين...واحسيناً واحسيناً باليقين
أربع احروف معاني اهوايه...و احنه كل عام نجي مشّايه

انعوف كلشي إلا شخصك ما نعوف...انوحد الرايات و انرص الصفوف
لو تعبنه من المشي نوصل ازحوف...انصير للعباس زندين و جفوف
و الله هيهات تطيح الرايه...و احنه كل عام نجي مشّايه

احنه شنسوي تره بحقك قليل...إي وحق دمع السبي و دمع العليل
مثلما زينب مشت درب الطويل...احنه نمشي و نمشي فوق المستحيل
حب الحسين وسيله و غايه...و احنه كل عام نجي مشّايه

احنه أول ما نشأنه بالحياة...شفنه حب حسين من المعجزات
الصلاه و الصوم و الحج و الزكاة...و الشفيع المنقذ بيوم الممات
و الأحاسيس قرتها الآيه...و احنه كل عام نجي مشّايه

أسهر الليل أنا و أشعاري...بس الحسين ملك أفكاري
يعجز الماي يطفي ناري...و أشعر حسين يريد الجاري
هذا أبو الماي تعثّر مايه...و احنه كل عام نجي مشّايه