عجب يالناشدت ليش الدمع يجري...أنا أستقبل شهر بيه ينكسر ظهري
عله جرف الشريعه ينهدم صبري
قبل لا يطلع اهلالك يالمحرم...شفت لون السواد اعله الوطن خيّم
تهيئنه و بدينه ننصب المأتم...يشهر الدم أريد أستقبلك بالدم
جبت ماي العذب حضّرته قدامي...يضامي ارتوي و اتذكر الضامي
تراني اتولعت بالخدمه من زغري...عله جرف الشريعه ينهدم صبري
أنا أستقبل شهر بيه ينذبح مصحف...بعد جيش أبرهه الكعبة علي يزحف
شهر بيه المشاعر تنتقل للطف...بحر عالمشرعه يوقع قطيع الجف
شهر زينب إجه يا عيني دم سيلي...أنا ليل اهدعش كل عمري يا ليلي
أنا بين المخيم ضيعت عمري...عله جرف الشريعه ينهدم صبري
شهر يدمي الصدر و اجفوفي لطّامه...شهر بيه الرؤوس اتغازل القامه
شهر بيه النبي يحترقن اخيامه...شهر بيه المنافق يكشف إلثامه
عله طاري الشهر يتأسس المجلس...مثل ونة رقية وني من أجلس
كأني بالخرابه و ينحفر قبري...عله جرف الشريعه ينهدم صبري
عجب يالناشدت ليش الدمع ساجم...أنا أستقبل شهر بيه تنسبي فاطم
اهي أول سبية من بني هاشم...شهر موت الضمير و صحوة الناقم
أكو ونة ذبيح من العطش يرجف...عداه ألف و سبعمية جرح ينزف
ينادي يا نهر ما برّدت صدري...عله جرف الشريعه ينهدم صبري
أنا أستقبل شهر بيه تكثر أوجاعي...أميل ابلا وعي وي نغمة الناعي
أحس صوت الحسين ايكسر أضلاعي...ألا من ناصرٍ متفارق أسماعي
أنادي يا حسين و نحري قدمته...و لا غالي يظل و الغالي بس انته
الشسع نعلك نحر ابني فده و نحري...عله جرف الشريعه ينهدم صبري
إلك هيئنه كلشي و ننتظر تظهر...بدأ موسم جراحي و مدمعي الأحمر
عله لحن القصايد نبضي يتغير...يشد عزمي الينادي بالمشق حيدر
أبشرك و الجفن من هسه حضّرته...تره متني الألم زنجيلي هيئته
شسوي ما أجازي موفقك أدري...عله جرف الشريعه ينهدم صبري
مواكبنه شرفنه و ما نسيناها...قبل لا يطلع اهلالك بنيناها
شعارات الوفه بالدم كتبناها...زيارة وارث الجيتك قريناها
نعم عندك علم نستقبلك بالون...أنافس و الخدم بالخدمه تتفنن
عله قدر المشقه و الأجر مغري...عله جرف الشريعه ينهدم صبري
