قومي يزينب وَلِّمي للعرس زينه...وفردي الخيمه و زيِّني بنتي سكينه

قومي يخويه للحسن بنأدِّي حقوق...خلّي البواجي ونشّفي دمعج المدفوق
قالت ألبّسها واخلي الجيب مشقوق...واقول عرّيسج يَسكْنه تفقدينه

شلون العرس يحسين وانتَ مالك أعوان...و جاسم شباب و بالزفاف يريد شبّان
والخيم بس ايتام تتصارخ ونسوان...وحدك اتزفّه و خيّك العبّاس وينه

وحدك اتزفّه و من اخوانك محّد اوياك...و النّبل يتخاطف عن اشمالك و يمناك
وامّا أنا باذوب من ضجّة يتاماك...ومْن النّواعي الحرم راسي مشيّبينه

قلها يخويه ابهالمصايب شاطريني...يَبْنة الزّهرا هالبلا بينج وبيني
مثلك أنا الشّبان خويه مشيّبيني...كل ساع أعاين شاب متعفّر جبينه

بالعجل جيبي الحرم يمّي و يّا ليتام...و خلّي العزيزه سكينه ابخيمه امن الخيام
و خلّي العليل يقوم ويبارك الجسّام...يتْجَلَّد سويعه و يبطّل من ونينه

سكّنت لوعتها ومسحت دمعة العين...و صاحت دقوموا يايتامى ويانساوين
بطلوا البجا واللطم مايرضى الولي حسين...صكّن هلاهل صوت جاسم زافينه

وَلْولَتْ رمله ونادته يحسين بالعون...ماشفت أنا عرّيس من خلفه ينعّون
مرّوا بعزيزي على اخوته بلكت ينهضون...من هالتّرب ويفرّعون قبال عينه