ما تحرق النار باب من السمه...و النّزل الموت صعّد فاطمه
 
المختار من راح قالوا نجتمع...و التقتل اهواي ما بيهم سبع
واحد عله الباب واحد عالضلع...من الزهره يا حيف نزل دم و دمع
صارت متنشاف من كثر الدمه...و النّزل الموت صعّد فاطمه
 
من طقها بالسوط وقع منها الطفل...عذّبها مسمار قاتلها قتل
و العصره بالباب أبد ما تنحمل...حمّاي الدخيل مقيود ابحبل
عالسكتة وصاه رسول المرحمه...و النّزل الموت صعّد فاطمه 
 
ما يشبه البوب باب أم الحسن...و اليوصل الباب يحس روحه بعدن
اشموع السنين و العيون انطفن...ابيا حاله أبو اتراب من لفها بجفن
يشم بيها و يطيح حماي الحمه...و النّزل الموت صعّد فاطمه 
 
جا مات أبو حسين من شاف الكسر...و اتموت الورود لمن تنعصر
اثمنطعش عام و اتنام بقبر...شاف الأصابيع مجوية بجمر
بعيونه دنياه صارت مظلمه...و النّزل الموت صعّد فاطمه 
 
دفنوها بالليل فقدوها الصبح...واولادها اجروح و الشامت ملح
من راحت حسين اتحضر للرمح...زينب بعدها تشوف اشجم جرح
و العالمه اتنوح لجل العالمه...و النّزل الموت صعّد فاطمه
 
صاح الحسن صاح يُمّه اتعذبت...بعدج جبدتي أذبها بالطشت
صاح إلها الحسين عايش بس متت...من هسه زينب تقلها اتيسرت
بسهام الأيام دلالي انرمه...و النّزل الموت صعّد فاطمه
 
يا وحشة البيت لو من أم خله...و الوادم اتقول وين أم الهله
حته الحياطين مثلها امهيله...كل العصافير اوياها المدلــله
عالزهره الجروح احزام امحزمه...و النّزل الموت صعّد فاطمه 
 
بجفوفه حيدر قبر فاطم حفر...القبر الزجية ما خله أثر
وصّه الموالين إذا شفتو ظهر...يعرف قبرها حفيدي المنتظر
و يصير للآل مسك الخاتمه...و النّزل الموت صعّد فاطمه