لو حان الرحيل...أنت تدري بواجبك...يحيدر
يالحزنك ثقيل...هالله هالله بزينبك...يحيدر

أحزان و ألم...و الحيل انهدم...اصعب ليله عالزهره
مكسور الضلع...واسوالف دمع...و الحسره تجر حسره
ليل بلا ضوه...مخنوق الهوه...بين الونه و العبره
قالت يا علي...يا هم ينجلي...خل عينك اعله الحره
ما ظل شي قليل...روحي راح اتودعك...يحيدر
 
يا عقد الوله...هاي امدللـه...زينب يا علي ابذمتك
ياذيها اليتم...بس يقضي الحلم...يالتعرف قلب بنتك
لو حمل البعد...و بعمر الورد...لو صح بيدي ما عفتك
أمر الله وصل...يا خير العمل...أمشي و تبدي فاجعتك
يالقلبك عليل...هذا جرحي يخاطبك...يحيدر
 
هذا أول جرح...عدها و ينفتح...باب الدمعه و الغصه
أرحل و العمر...بيها اشينتظر...لا ما تخلص القصه
تتيتم ترد...لمن تبتعد...عنها و ما تظل فرصه
بحسين وحسن...تترجه وطن...عمر الفرقه شيخلصه
دنيه ومن تميل...كل قصدها اتعذبك...يحيدر
 
زينب و الزمن...عبرات وشجن...الله يساعدج يزينب
فقد المجتبه...بهمها اتواكبه...مهضومه و بعد تتعب
يا حيل و تشد...لو شافت جبد...من سم الغدر يلهب
هم أم و أبو...و النوب الأخو...تصبر و الوضع يصعب
مفجوع الدليل...مو قصدها اتعاتبك...يحيدر
 
تكبر و الحزن...كل ليل اليجن...ما عدها جفن غافي
حته بهالوكت...و المدمع يكت...جمر اللوعه مو طافي
أصعب معضله...اسأل كربله...دنيه و تغدر تجافي
من شيب القهر...أشكال الصور...ما قال الحزن كافي
تفرح مستحيل...من حزنها تندبك...يحيدر 
 
طف و موعده...لو حان وبده...زينب همها متواصل
توصل هالوطن...مكفوله بضعن...خله بغيرة الكافل
تفقد جم أمل...عالغبره يظل...تاريخ الألم حافل
محزوز النحر...مدري عالنهر...تنعه بصف أبو فاضل
تمشي ابلا كفيل...لو سبوها مهجتك...يحيدر
 
منك و النعم...يالكلك عزم...قدها و خالقك شاهد
ليلك من يجن...اسرع بالدفن...خافن زينب اتناشد
هاي المسأله...آنا الراحله...فوضت أمري للواحد
بحسره أتأملك...من اتخيلك...بعد الوحدك قاعد
بالصبر الجميل...هاي روحي اتطالبك...يحيدر