أحزاني بيني و بينك…يا حيدر و الله ايعينك
انت امسح دمعة عيني…و آنا أمسح دمعة عينك
تشاركنه من أول يوم عله الحلوه و عله المُره…تقاسمت العمر وياك حصير و مسند و جره
نعيش ببيت جان اصغير لجن بعيونه اشكبره…صبرنه اعله الفقر و الجوع المهم خل تشبع الفُقره
اثنين احنه و ربك شاهد…بس جان المصدر واحد
نورك شع وسط اجبيني…نوري وشع وسط اجبينك
يحيدر هاجرت وياك عفت مكه و صرت بأمرك…قلت لي اعله البله اتصبرين قلت روح الهوه ابظهرك
صرت لك بالشداد احزام أشد من عزمك و صبرك…لجن هاليوم اعذرني اذا قلت الذي يكسرك
يا حيدر قرب موتي…شّيع بيدك تابوتي
خل سلمان اعله ايسارك…و المقداد اعله ايمينك
مثلما نقسم الخبزة تعال انقسم الونه…يون كل واحد بطوره و يظل كل واحد و فنه
إلك صفنه بتوالي الليل جي محد وقف صفنه…و أنا بنوحي أيبس أغصان شجرة طوبه بالجنه
عاوني ببيت أحزاني…واحد ينحب عالثاني
من أجلك صار اونيني…من أجلي صار اونينك
مثلما قسم الأرزاق ربنه للحزن قسّم…رزقنه من الحياة اجروح لجن يا هو النصيب أعظم
انت التكظم اعله الغيظ و أنا البلمسجد أتكلم…إيدك بالحبال تنقاد و ايدي بسوط تتورم
ما بين الهم و الغصه…كل واحد ماخذ حصه
جويت جمره بجفيني…حز القيد بجفينك
يومين العمر قالوا يعدن بالوصل و البين…لجن من دون الناس نعيش الحسرة باليومين
تعال انوفي حق النوح و نقسم أيتامنه نصين…تنوح الزينب و جلثوم و أنوح آنا الحسن وحسين
زينب مثلك تتجتف…تنجر باجر برض الطف
مثل اضلوعي المهشومه…يتهشم ضلع احسينك
انتشابه صرنه يا بو حسين بلون اعيونه الحمره…احمرت بالغضب عينك و أنا احمرت من السطره
أشد عصابتي براسي المثل وجهي صفت صفره…من اهروشه انقطع قلبك مثلما قطعوا الشجره
باجر من تغمض عيني…و يخلص نوح اسنيني
أرتاح بموتي و انت…شيخلص نوح اسنينك
تشاطرنه المصاب بحيث صار اصوابك اصوابي…أهل دمعي عله امصابك تهل دمعك عله امصابي
انكسرت شوكت الإسلام يبو حسين بكسر بابي…حجاب الله انهتك و انداس لمن داسوا عله اعتابي
حيهم يا حمزه و جعفر…اتصيح و لا واحد يحضر
خانت هالأمة بعهدك…وين الأنصار ووينك
