طلب واحد يدنيانه...تدليني اعله عنوانه
عهد بينج و بيني...أشوفه و اخذي عيني
ضايع و أدور من زغر ما كو و لا حته خبر...و اليلوي ذرعانه العطش يتحلم بشوفة نهر
و الظلمه شامت مختفي تضحك عالضيع قمر...قالوا لي أيس يالوفي ما تلقه للضايع أثر
وصل وني السمه السابع...أكو عدنه قبر ضايع
بده يكثر حنيني...أشوفه و اخذي عيني
عالفرقه و الهم و الحزن ما يحتمل قلبي الوفي...أتلفت بوادي الحزن ظليت أشب و أنطفي
مره أصيح امن الألم بالله يدنيانه انصفي...مره أصيحن يا علي ليش القبر ظل مختفي
يبو الحمله بقت حسره...أزور أم الحسن مره
خلص عمري بوينني...أشوفه و اخذي عيني
زرت المدينة و دورت مثل الذي ايدور هوه...يم النبي لمن رحت شفت الشمع ما بيه ضوه
برض البقيع الينجرح ما يحصل الجرحه دوه...القبر الحسن صار الأمل معقوله دفنوهم سوه
يبو القاسم عليك أمك...أكو إلها قبر يمك
يدنيه طمنيني...أشوفه و اخذي عيني
رديت أعاتب و الجرح بسما بده اعتابي نزف...لمن وقعت من التعب ظليت أحس كلشي اختلف
و الواقع اويايه انصدم و الصحره قالت لي وسف...وين القبر يا با الحسن جيتك أدور بالنجف
علي ياللي همت بيها...بعيدة ما تخليها
أدور كل سنيني...أشوفه و اخذي عيني
ظليت أحوم بحضرتك و انده يحماي الحمه...يا بو الترافة و الوفه معقوله تترك فاطمه
قلبي يقلي يم علي و النجمه متعوف السمه...علمني و آنا اواداعتك سر القبر ما أعّلمه
بقيت أتوسلك و أبجي...وحق الزهرة ما أحجي
دمع أده يميني...أشوفه و اخذي عيني
ما كو جواب و أيست و الكربله قلبي قصد...يمكن قبرها بكربله و الوالدة اتريد الولد
حلفت أبو اليمه بعلي جاوبني مو يمي أبد...سلم عليها و تسمعك لا تمشي و اتدور بعد
عله الونه دساعدها...تره أمي انسطر خدها
يدنيه ساعديني...أشوفه و اخذي عيني
آخر محطات الحزن جانت مسه و نجمة ظهر...قالت لي للشام اعتني يم زينب و عوف الصبر
لا تذكر الطف و السبي بالك تسولف عاليسر...قلها يزينب أيست قبر الزجية ابيا كتر
ابغلاة اللي انطفت عينه...تدليني القبر وينه
يحره اتحمليني...أشوفه و اخذي عيني
أسمع ونين من القبر و اتأكدت ونت خدر...من اسمعت زينب تون و اتصورت سوط الشمر
قالت لي غايبنه يرد و الطلعة المهدي أنتظر...لا زال أكو كسرت ضلع قائمنه ظهره منكسر
أبو صالح يجي ليكم...بقبر فاطم يدليكم
أظل لمن يجيني...أشوفه و اخذي عيني
