نور الحجاب بجه اعله احجابه...سيد الكون توجر بابه
ساكت اشلون يليث الغابه 
 
إسألت أهل الذكر و البلصداره...دققت بالمجلسي ومصدر بحاره
ليش أبو الحملة سكت ما سل فقاره...هوه حماي الحمه و ما يحمي داره
بعض العقول تشكك بيها...و الضوه اليوم نسلطه اعليها
بالله شتقول حروف اكتابه 
 
في بحار المجلسي و الجاني يشهد...من دفع باب النبي وبيده المهند
اتلقته الزهره و تنادي يا محمد...بخاصرتها طقها و اعليها ايتهدد
عاد أبو حسين جدح نوماسه...خله رجله اعله راسه وداسه
أنفه مكسور رجع لصحابه
 
قله يا هذا اتعرفني وتدري بيه...آنه بو حسين وأسد الله ونبيه
خبروك وتدري مجتوف بوصية...الهالسبب صاير رجل يم الزجية
والله لوما وصية طاها...أقلب الكون لجل عيناها
والسطرها يطول احسابه
 
بهالراوية أجوبة للما قروها...يعني حيدر ما سكت من هاجموها
رادوا ايسل صارمه بشتمة أبوها...فتنه رادوا و الرسالة ايمزقوها
رادوا السيف يحصل حيفه...ينتهي الدين إذا سل سيفه
يمكن الآن عرفتوا إجوابه
 
شيّع بليل أظلم الزهره الحبيبه...يا غريب اعله المتن يحمل غريبه
وحده شيّعها علي بجمرة نحيبه...حته نعرف شنهو أسباب المصيبه
حته الأجيال تعرف الواقع...فاطمه ليش قبرها ضايع
واجب اليوم نعرف أسبابه
 
قرروا نبش القبر و الغاية خطره...يعني قتلوج و يشيعونج يزهره
اتفاجئوا لن حيدره بعمامه صفره...عرفوا اليقرب إله بالنص يشطره
هسه لهنا يقلهم كافي...سيفي يخبط وليه الصافي
بالقلب نار تظل لهّابه
 
الهالسبب ظل القبر مخفي علينه...حته يتأكد سبب موت الحنينه
نمشي نتلفت نظل برض المدينه...بيا كتر قبرج يزهره ما درينه
مدري يا يوم تصير الغاية...شيعتج هاي تجي مشّاية
قبرج انريد نبوس اترابه 
 
يمته غايبنه يجي وينطي الإشاره...احنه وي مهدينه نمشي للزياره
يا لثارات الضلع يرفع شعاره...هذا راعي الثار إجه يطالب بثاره
واحنه جنده ونشيل الراية...يا علي انصيح نظل وفّاية
ندعي كل يوم يجي من اغيابه