يراحة بالي...مكانج خالي...جمر بأنفاسي...و احساسي كسروا ضلعها
يماي الكوثر...صرت مو حيدر...يدور براسي...و احساسي كسروا ضلعها
  
حبيبة روحي...ضماد اجروحي...عليها اشصاير من خوفي وجعّني قلبي
ردت أوصلها...عليه أسالها...تهد و اجدامي تتعثر وشطوله دربي
وصلت البيتي...شفت عافيتي...شمس مجروحه و اتناظر و اعليه تربي
بجن ويايه...حجاب و آيه...قلت عالظالم و الطاغي اشهد يربي
إذا مر بيها...الهوه يأذيها...شيصير بحالي...و احساسي كسروا ضلعها
ترافة ورده...عطر ما بعده...شنو اليجرالي...و احساسي كسروا ضلعها
 
بقت تشكيلي...وأعاتب ليلي...ولا جن يسمع تعبني و ما جاني صبحه
رهيبة الحاله...الحبيبه اقباله...يشوفه يعاني و ما يقدر يداوي جرحه
أثر يم بابي...لأعز أحبابي...دمع و معاتب و آثار الأيادي وكحه
وحق دمعتها...وجرح عصرتها...الوعد خلاني الآذاها ما روح أذبحه
وحق العالي...وصية الغالي...شلتها بعيني...و احساسي كسروا ضلعها
نطيت احجايه...حفظت الغاية...وفيت الديني...و احساسي كسروا ضلعها
 
يجرحي الثاني...خفيت أحزاني...كتمت أهمومي وفاضحني دمعي اعله رمشي
كسر بجناحي...بعيده أفراحي...العمر من دونج يا روحي جابولي نعشي
حِمل ساعاتي...بثقل آهاتي...زماني الواقف لعيونج ما يرضه يمشي
شنو الباقي لي...يشمعة ليلي...يعمري الرايح و الآتي كنتي لي كلشي
عجيبة أحلامي...وهذيج أيامي...يصيرن ماضي...و احساسي كسروا ضلعها
دعيت الباري...يبرد ناري...الحكم و القاضي...و احساسي كسروا ضلعها
 
أميرة روحي...ضماد اجروحي...وأعز ما عندي ودلالي واعليها خايف
ملاك اسنيني...و اعز من عيني...حجيها الدافي يتعثر بين الشفايف
بدت تبجي لي...الدمع يحجي لي...عذاب الفرقه و العشره صارت سوالف
ملكت أعصابي...حسبت إحسابي...أضم ادموعي ما جني شايف
دمعتي انهارت...جهنم صارت...نفذ كل صبري...و احساسي كسروا ضلعها
صحت يا ساتر...خفت من باجر...نهاية عمري...و احساسي كسروا ضلعها
 
أغسل بيها...و أخاف أجويها...دموعي الطاحت من عيني تحرق جهنم
لزمت الكسره...شبجت العشره...جبل لو شايف هالحاله يمكن تهشم
اليغسل بيده...فرحته وعيده...تضيع آماله و اسنينه وعمره ايتهدم
ردت بجفوني...أجفن اعيوني...و ألفها بروحي و بصدري جرحها يلتم
وطن كانت لي...جرح عافت لي...طفت حنيتي...و احساسي كسروا ضلعها
شريكة همي...واحسها بدمي...نبض عافيتي...و احساسي كسروا ضلعها
 
شمس وانباقت...وروحي اشتاقت...و أحس نبضاتي بشرياني عني غريبه
التسد العازه...شلتها اجنازه...دفنت بإيدي غاليتي دنيه عجيبه
المشاهد تجرح...الزمن ما يسمح...أسوي بصدري وبضلوعي قبر الحبيبه
طويل افراقي...و جبيرة أشواقي...كأني بزينب من هسه صارت سليبه
الحسن بجروحه...يوادع روحه...كسر بالخاطر...و احساسي كسروا ضلعها
و أشوف حسيني...يتيم بعيني...عله أمه يناظر...و احساسي كسروا ضلعها
 
يكل أحبابي...طويت اكتابي...دعيت الباري ينسيني وأحاول أنسه
جبيره أوجاعي...كسر بشراعي...سفينة وتاهت بظلمه و ما إلها مرسه
أشوف القادم...زماني الظالم...كأن طف ولدي و احتوفه بدوها هسه
أشوف الخاين...علينه ايعاين...يعد اجيوشه و اخيوله و الدنيه خرسه
يزيد وحزبه...وشرارة حربه...بدت هجماته...و احساسي كسروا ضلعها
الغدر بالزهره...عله ابني وصدره...أثر لمساته...و احساسي كسروا ضلعها