مسجون إو غريب إو ما له چاره...إو ساقه المنجرح دم إيتجاره
(وإمكبّـل الساقين...ياباب الحوائج)
* * *
عادة ما بين الحمايل كل غريب إبدار غربه
إيطيح بشراك النوايب والنوايب تملي گلبه
لا بد إمن الناس عين إتعينه بيها إيشوف دربه
إو باب الحوائج غربته...سيف إو تگص إبچبدته
إو ماله معين إبشدته...غير صبره إو لطف ربه
حتى دمعة الكـاظم غريبه...تتفايض إمن إعيون المصيبه
إو تصرخ دمعة العين...ياباب الحوائج
* * *
لو گلت غربة الكاظم بالگلب يسعر جمرها
هاك إخذ يالمحب سجنه إو غربته إيهوّن أمرها
مو سجن طاموره حدر ألأرض يا مصعب عسرها
ما ينسمع بيها اليون...(المسجون بيها ممتحن)
ألله الله السجن...چبدة الكاظم فطرها
سجن المظلم إبليله إو نهاره...والمسجون ما يـاخذ قراره
وإمرضرض الجنبين...يا باب الحوائج
* * *
هذا وصف السجن كافي إو دمعتك لمصابه هلها
خاف إبينلك مصيبه والمصيبه متحملها
بالسجن يندب الكاظم للسلاسل من يحلها
مسجون وإمفارج هله...والضرب حيله نحله
والجمر جمر السلسله...مهجة الكاظم شعلها
إو روحه إمگطعه إبشفرة إهمومه...إو جرح الساق تتفايض إدمومه
وإمكبل المتنين...ياباب الحوائج
* * *
غربة الكاظم إو سجنه هانت إبشدة حديده
إنحب إنحب يالموالي إو زيد ون الچبد زيده
وأرد أبينلك مصيبه إو خايف الگلبك تچيده
بالكـاظم إشسوه الدهر...والسندي ما تدري إشسطر
وإبيا وجه خله ألأثر...إبوجه ناموس العقيده
إو ظلت سطرة السندي علامـه...جمره إو تسعر اليوم القيامه
بگلوب الموالين...يا باب الحوائج
* * *
إشلون إربو طعش عام إگضيتها إبشده إو نوايب
بالسجون إتلوج روحك والگلب مجمور ذايب
وحدك إتجود إو تعالج لا عمام ولا گرايب
صبرك إبحلمـك متصل...من النوايب ما تمل
تاليـها بالسم تنچتل...إو هاي أمضه إمن المصايب
مسجون إو غريب إو يسمونك...إو من سجنك عبيد إيشيعونك
إو فگدك يتم الديـن...يا باب الحوائج
* * *
بالغرب مطروح نعشك والفلك دونك مداره
والملك صاعد إو نازل عالجسر نعشك مزاره
إو سل البگلبك إبگلبي إو جمر يتطاير شاره
والغـدر بالسم چتلتك...وإمحيرين إجنازتك
هزت العالم غربتك...بچّت إعيون النصاره
جسمك ظل ثلث تيام مرمي...إو ساقك من نزيف إدماك مدمي
إو يومك يـوم الحسين...يا باب الحوائج
* * *
شيعو نعشه عبيد ألأربعه إبظاهر الحاله
إو باطن التشييع آيه إو نصّت من رب الجلاله
إو نزلت إصفوف ألأملاك إتشيعك بإسم الرساله
وجبريل وأشراف الملك...بإسم الشهاده شاهدك
إو علم ألإمامه إو مسندك...للرضا صار إنتقاله
وإضلوع الرضا إلفگدك حناها...والديـن إو هله معلن باها
إو تتصـارخ الكونين...يا باب الحوائج
* * *