« «شيعتي»»
راح...بالسـم چتل راح
چان إبحديده ممتحن...باب الحوايج بالسجن
بالسم چتل راح
* * *
غابت إنجوم الكرامه إو غربت شمس المچارم
إو علم للإسلام طاح إو سگط من چفه الصارم
صيحو بألله إوياي صيحو ليش جف بحر المغانم
إو ليش المدامع هامله...إو يتصارخ الدين وهله
أحّا ينار السلسله...يبست چبدة الكاظم
إرتاح...والسندي إرتاح
چان إبعذابه منفتن...باب الحوايج بالسجن
بالسم چتل راح
* * *
باب من بوب ألإله الواسعه إو فاز الدخلها
إو چان للإسلام مگصد والمشاكلها يحلها
إو چان للوفاد مورد وإبّحر جوده أملها
تدرون بالسندي إشعمل...بالسجن والسم إشچتل
روح الهبه إو نفس ألأمل...يالعلي وألله چتلها
طاح...ركـن ألأمل طاح
وإتعمرت إديـار الحزن...باب الحوايج بالسجن
بالسم چتل راح
* * *
إهنا يهل محتار بأمرك چنت راحلتك تشدها
إو تگصد الكاظم إو روحك ترد مسروره إبصگدها
عاد أريدك ذيچ إيد الچنت للحاجه تمدها
هاليـوم صكها إبوجنتك...عالكاظم إو هل دمعتك
إو جمرة السم إبچبدتك...خله يتواگد وجدها
أرواح...تفداك ألأرواح
وإتجادي روحه لا تظن...باب الحوايج بالسجن
بالسم چتل راح
* * *
يالچنت تطلب الحاجه وإخوتك ما يسمعونك
إو چنت من دارك تصد للكاظم إو تدمع إعيونك
إتصيح يا باب الحوائج تسمع إيناديك عونك
دسمع الكـاظم صيحته...بالسجن يندب شيعته
حل السلاسل رادته...يالمحب بألله إعله هونك
صاح...چن الرضـا صاح
وين العله إمصابي يحن...باب الحوايج بالسجن
بالسم چتل راح
* * *
چانت الوادم إبيوم إللي عليها الضيج يشتد
إتلوذ بالكاظم الرأفه رحمته أتمثل محمد
ما دريت إشلون گلب السندي جلمود إو تجلد
أحّا يلمعة سطرته...أحّا يسجنه إو شدته
أحّا يسمه إو جمـرته...إشكثر بيها إگلوب مرّد
ناح...ليس الملك ناح
ليش البشر ينعه إو يـون...باب الحوايج بالسجن
بالسم چتل راح
* * *
صِد يمن عندك عقيده للجسر وإنظر إبريبه
إجنازة الكاظم إو يمها بت رسول ألله إو حبيبه
فاطمه إو كل يوم عدها إجنازه مطروحه إز غريبه
هذا المغسّل بالدمه...إو ذاك ألإضلوعـه إمهشمه
إو هذا الفطر چبده الضمه...هاللّه هاللّه إشهالمصيبه
فاح...دمع الحزن فاح
إمن الزهره للأب وألأبن...باب الحوايج بالسجن
بالسم چتل راح
* * *
يا إلهي إبجاه مجره إعيون فاطمة الزچيه
صد علينه إبعين رحمه إو وجه نعمه دائميه
إو أجر خدمتنه وردنه الكوثر الجنه الزهيه
باللوح تأمر عالقلم...يكتبنه للزهره خـدم
تربط ولانه والذمم...بالولايه الحيدريه
أشباح...بالخمسه ألأشباح
إو بإسم الولايه تنعلن...باب الحوايج بالسجن
بالسم چتل راح
* * *
