باصرت إيمانه...عالسجن سهرانه
غربة الكاظم...يتمت هاشم
وإنچست بحـزانه...عالسجن سهرانه
* * *
إيمان گلب الكاظم إبسجنه إيحوم...تزهر أنواره
إيباريه ويضمد دليله المالوم...وإيطفي ناره
يدريبه ما يهجع ولا يشوف النوم...ليله إو نهاره
چي تنام إعيونه...إو سلسله بمتونه
كثرت إجروحه...إو فرفرت روحه
إو تشغر إلديـّـانه...عالسجن سهرانه
* * *
شتصير روح الكاظم المسجونه...إو سجن المردها
إبثگل السلاسل حايره مرهونه...إتعالج وحدها
لاچن يسليها الصبر بفنونه...ويضمن سعدها
بالغرب مبليه...وبالسجن مرميه
والصبر عونه...إو تنعم إعيونه
حكمته إو برهانه...عالسجن سهرانه
* * *
صدر العليه علم الرسول إتكور...وإحفظ كيانه
بين الخلگ يتقدس إو يتقرر...نشره إو بيانه
إو باب الحوايج بالسجون إتمرمر...والسندي هـانه
إمن الهوه إيحرمونه...إبسجنه وإيهينونه
إو عصمت أجداده...إو عزت الساده
حايمـه إبأركانه...عالسجن سهرانه
* * *
ممرود گلب الكاظم إمن أيامه...وإنهدم حيله
إو گوس الدهر عيّن عليه إسهامه...إو گطع دليـله
محتسب بألله إو ملتزم بحكامه...إو قايم إبليله
إو ساجـد إبمحرابه...وإبدليله إصوابه
إسهام چتاله...وإنمرد حاله
من ظلم عدوانـه...عالسجن سهرانه
* * *
ظلت إبوجه الكاظم من أهل اجور...للسندي سطـره
جمرة غرب تلذع إبگلبه المكسور...للسطره جمره
صابر الكاظم عله البلوه إو مجمور...للباري صبره
مدرع إبتوحيـده...إو بالورع تأييده
والجسم نـاحل...من السلاسل
إبمهجته الخلصانه...عالسجن سهرانه
* * *
إو چاس الصبر گطع إبگلبه السِبّاح...من جـرع سمه
خلاه لايج بالسجن ما يرتاح...وإيجلبه همه
ومن شدت السم نشف جرحه السفاح...من يبس دمه
ما رعو قدسيته...ضيعو روحيته
وإشيطلبونه...إبسم يچتلونه
إو سيطرة سجـانه...عالسجن سهرانه
* * *
نعش العليه دمع الرساله الهمال...سامي مقامه
إو دمع السمه فوگ الوطيه ينهال...بإسم ألإمامه
بأربع عبيد إمن السجن ما ينشال...يهل الكرامه
وعالجسر يرمونـه...إمحدد إيخلونه
إو چانت أنصاره...تطلب أخباره
إمحيره ولهانه...عالسجن سهرانه
* * *