سجين السندي
«ميمر مذيل»
يا هلي إتضيعوني...إو بالسجن تلگوني
ما إلي چاره...والسجن ناره
جمرتـه بعيوني...بالسجن تلگوني
* * *
باب الحوايج يندب أنصار الدين...يهل المحنه
عدكم علم يالبالعلم متغذين...وأنشأتو منه
السم والسجن والچتل من التكوين...متسجل إلنه
إومن يصيب إصوابي...إتهيئو لمصابي
فگدي يخبركم...لو غبت عنكم
بالغـرب دوروني...بالسجن تلگوني
* * *
آنه الكظمت الغيظ ساعات الجور...والكاظم إسمي
وآنه العليـّه إموجهه إسهام الزور...والدهر يرمي
إو لو طحت بشراك النوايب مكسور...تلگونـه جسمي
بالسجون إمدد...بالحديد إمحدد
وأنزع إبروحي...إو تنزف إجروحـي
إو بالـورع ضمدوني...بالسجن تلگوني
* * *
إبطاموره حدر ألأرض من العدوان...لو ذبني دهـري
لا ضوه إو لا شمعه إو هوه ولا إنسان...يشرك إبأمري
إو شمعة حياتي لو طفاها السجان...يعلگها صبري
والصبر عنـواني...يزهر إبإيماني
إو محتسب ربـي...إو منگطع گلبي
إو سلسله بمتونـي...بالسجن تلگوني
* * *
وآنه الذي إبطول العمر ما مرتاح...وأتحمل الهم
إو سهم العده إيگطع إبگلبي السباح...وإينشف الدم
إو ما غيرنه الهالدين تفدي ألأرواح...بالچتـل والسم
والچتل عادتنه...والسجن راحتنه
لو گرب وعدي...وإنگضه عهدي
بالصبر وافوني...بالسجن تلگوني
* * *
أمسي إبسجن وأصبح سجن وأتمرمر...وأحسب أيامي
وإبصدري حسرات ألسجن تتكسر...والجفن دامي
إو گلبي تره إبسم الغدر يتفطر...لا يا عمامي
إومن تضيع آثاري...ليغداكم ثاري
گلبي يرعاكم...وأنه إبرجواكم
لو صحت حيونـي...بالسجن تلگوني
* * *
إشما جرع گلبي إمن النوايب صبره...يشگفها عنه
والسجن والسجان هين أمره...ينگضي إبونـه
وإبوجهي لمن تسمعون السطره...صيحو يهلنه
نشفولي إدمـوعي...إو جبرولي إضلوعي
وأنه إبطاموره...إو روحي مجموره
والعده إيهينوني...بالسجن تلگوني
* * *
بإسم الغريب البي قضاء الحاجات...يا ربي نسأل
تنعم علينه بالفرج والشدات...بالفرج تنحل
للغايب إتگرب بعيد الساعات...وألأمر يسهل
سهل الغايبنه...إو باللطف حاسبنه
إبصيحة الكاظم...من نده هاشم
يا هلي چتلوني...بالسجن تلگوني
* * *
