وصية ألإمام الكاظم لولده ألإمام الرضا (عليهما السلام)
« «ميمر»»
يعيوني يعيوني...يالرضه يعيوني
هاك إسمع وصاياي...يبني گطرلي الماي
بالسجن چتـلوني...يالرضه يعيوني
* * *
إصغي إللسان الحال وإسمع تبيين...حالة الكاظم...وإنته عالهم كاظم
من طاح بيد الميعرف ذمه إو دين...سجانه ظالم...وإشيـّحَمْل الظالم
إتمنه الرضه وإبن الرضه إبذاك الحين...عد راسه قائم...وإبخدمته قائم
تدروني تدروني...بالسجن تدروني
بالسلاسل مرهون...چي علي متمرون
بالسجن تدرونـي...يالرضه يعيوني
* * *
صد للغريب إبدمعته إو ناداه...تعتب علينه...وإشيطح بيدينه
علمك عليم إو حالته ما يخفاه...الحيروك وألله مثلك إمحيرينه
والكاظم إختص إبعزيزه إو وصاه...بأسرار علمه وإبسراير دينه
إتفگدوني إتفگدوني...بـاچر إتفگدوني
هاللّه هاللّه إبدينك...خلها تسهر عينك
باچر إتفگدوني...يالرضه يعيوني
* * *
دگعد يماي العين خل أگضي إوياك...من صبري ساعه...حتى تدنـه الساعه
وأدري إبوداعي ينمرد لب إحشاك...إو تلسع دليلك جمرته اللساعه
إو سم الجرعته بالسجن ما يخفاك...جرعته الطاعه...إو للإله الطاعه
خلوني خلوني...ممتحن خلوني
صابر إو روحي إتجود...بالسلاسل وإگـيود
ممتحن خلـوني...يالرضه يعيوني
* * *
كل يوم لني إبسجن مظلم مطروح...يانسني نوحي...والعباده إبنوحي
إو ثگل السلاسل أثر إبجسمي إجروح...وإخلصت روحي...من نزيف إجروحي
وإبجمرة السم إنسلت مني الروح...جمدت موحي...إو يبس دمي إو موحي
بمتوني بمتوني...وألأثـر بمتوني
من السلاسل صار...والسم شعلني إبنار
وألأثـر بمتوني...يالرضه يعيوني
* * *
هذا الچسبته إمن الدهر وأفعاله...يشهدلي ربي...واليكافي ربي
ألله من عسر السجن وأحواله...وإعيوني تربي...إو عالمگدر تربي
إو سطرة السندي إسهامها چتاله...صوبت گلبي...وإلچمتني إبگلبي
سطروني سطروني...عالـوجه سطروني
والسجن أمره إيهون...إبسطرة السندي إشلون
عالوجه سطروني...يالرضه يعيوني
* * *
وإمن السجن مچتول لو طلعوني...والكـون يجزع...إصبر إو لا تجزع
يبني إو حماميل أربعه إيشيلوني...إو نعشي إيتـودع...عالجسر يتودع
إو غير الذي منسوب إلي إينسبوني...هـاك الورع...وإهـ ـناك بيه إتورع
إيشيعوني إيشيعوني...شيعتي إيشيعوني
والحديـد إيحلوه...جرح ساگي إيشدوه
شيعتي إيشعوني...يالرضه يعيوني
* * *
هذا العلينه إمقرر إو بيه مرسوم...وإبسره نعلم...وألإله ألأعلم
ما منه إلا منچتل لو مسموم...أمـره إوتحتم...نافذ اليتحتم
هذا آنه إوهم بعد إلك مثلي يوم...تنچتل بالسم...وإنتظر يبني السم
وصـوني وصوني...إبهالأمر وصوني
حافظين ألأسـرار...وألأئمه ألأطهار
إبهالأمر وصوني...يالرضه يعيوني
* * *
