تمسكت بولائك يا أبا الرضا
« تجليبه هوسات »
يموسى النجد موسى من سحر فرعون...وكل أمر اليهم الكـون بيك إيهون
يجسم الكائنات إو روح جسم الكون
يا نون التكوين إو كافه
* * *
ببرهان الزبور وللصحف تمثيل...يبهجة خاطر التوراة وألإنجيل
يالسان الوحي إو يا منطق التنزيل
يا سر المحفوظ إبلوحه
* * *
گاصدلك إو من (إسهام علتي) شچـاي...دهري نحل جسمي ونخب عظمي الداي
أريد إدواي منك يالتعرف إدواي
يالكاظم تدري إشمگصودي
* * *
گاصدلك وروحي الدهر مرمرها...وأريد المعسره إبوجهي تيسرها
وسفن حاجاتنه شلهت دسيرها
يمسير نوح إبطوفانه
* * *
گاصدلك شريد إبگصدي تدريني...أضمد جـرح البساقك الماذيني
وأطفي جمرة السم إبدمع عيني
من گلبك يا ماي إعيوني
* * *
گاصدلك وكسرة خـاطري وياي...عله إمصابك ومن عيني تفيض إچلاي
وسم إللي شربته جمرته بحشاي
وإتگص إبگلبي وسباحه
* * *
گاصدلك إو جرح السلسله يـدي...وسم إللي مرد چبدك مرد چبدي
مثل وجهك إبوجهي سطرة السندي
وإبسجنك تتگلب روحي
* * *
گاصدلك وأهيس بالگلب چـانون...يوِّج من سطرة السندي وظلم هارون
روحي إوياك وآنه إعله الجسر مرهون
عد نعشك محنيه إضلوعي
* * *
گاصدلك إو روحي إبجسمي تتحلتم...ومثل إعضاك بعضاي إيتجاره السم
وعيني من جرح ساقك تهيل الدم
وإگياد إمتونك بمتوني
* * *
