هذي دمعة كربله نجريها...جمره من لبّ القلب نبديها
العقيدة الكامله...هذي دمعة كربله
هذي دمعة كربله وماي الحياة...نزفت بجفن المحب من هالفلاة
تجري من نهر القلب ويّه الفرات...آيه من وحي الله ما نخفيها
والمدامع هامله...هذي دمعة كربله
يوم طاح حسين ضجّت كربله...وأضحت الدّنيه حزينه ومعوله
وهالحزن إحنه الذي نتكفله...لله وفروض المودّه نشيلها
وهالدموع مسبّله...هذي دمعة كربله
ما نلوم اللي بجه ودمعه همه...عينه عالدّمعه الشريفه معلّمه
هذا ميراث الشرف من فاطمه...عيونّه بصبح ومسه تواسيها
عِدهه والله مسجّله...هذي دمعة كربله
هم يصير العين ما تبجي الشّهيد...تبخل بدمعه على مصاب الوريد
تنحشر ويْ حرمله وشمر ويزيد...عيون ما تبجي الحقد يعميها
الله يلعن حرمله...هذي دمعة كربله
يفرح بعاشور قلب النّاصبي...وآنه دمعي بهالمآتم صاحبي
حسين ديني وكل حياتي ومذهبي...حقوق حزنه بالدّمه أوفيها
وبالكتاب مسجّله...هذي دمعة كربله
حسين عَبره بالقلب اسمه انحفر...آهة مصابه تفت قلب الصخر
قطره من دمع المحب طفّت سقر...ونار حزنه تزيد ما تطفيها
تبقه دوم مشعّله...هذي دمعة كربله