فجيعة أُم البنين
« شيعتي»
آنه أُم البنين إو دهري ذبني
حگي لو صحت يحسين يبني
فگد ألأربعه إيهون...وحسين السباني
* * *
إتعبت وإسهرت الليالي وإعلگت شمعة وجودي
حتى ربيت البنين ألأربعه البيهم سعودي
إمعاهده گصدي إبرباهم أُوفي للزهره عهودي
إبدمهم تراني إتبرعت...للزهره وإبعهدي إصدقت
إو ظنيت بحسين إسلمت...وإبحياة حسين زودي
فگد ألأربعه ما هـدم بيتي...لو بحسين ملزومه ثنيتي
وإشلون أصبر إشلون...وحسين السباني
* * *
صدگ ساهرت الليالي وإمردت روحي برباهم
صدگ صارو بالفراسه إسباع ما واحد لواهم
صدگ خيّم عالحرايب بيد أبو فاضل لواهم
وإذخرت بالدنيه إذخرت...عيناچ صاحو لو صحت
ضحيتهم وإتأملت...أشتري حسين إبدماهم
فگد ألأربعه نشّف إدمـوعي...وإعله حسين متكسره إضلوعي
إو صدر حسين مسحون...وحسين السباني
* * *
إشلون صفوة مجد من المرتضه الباري إصطفاهم
إو نزّه إمن الدنس حجري إوكفل من حيدر ولاهم
إو طهّر الباري حليبي وإمزجت روحي إبغذاهم
وإغرست بيهم غـانمه...إو صـارو إسباع الملحمه
إو لحسين مهجة فاطمه...گلبي وإلساني هداهم
إو عن ألأربـع لا تنشدوني...إو بيهم يا خلگ لا تفجعوني
إو فازو خل يفوزون...وحسين السباني
* * *
يا بشر من تصد عيني لبو السجاد إو جماله
چانت إتشاهد محمد يزهر إبنور الرساله
آنه وصيت التوّزم بالعلم يكفل إعياله
والكفل سبع الگنطره...والضعن لأرض الطـف سره
إو ما أدري بحسين إشجره...إو بالتعهد بالكفاله
بس يسلم حسين إمن المنـايه...خل إتروح شباني ضحايه
إو عنهم لا تنشدون...وحسين السباني
* * *
آه يا غربة عليل حسين من رد للمدينه
إو بِشر بن حذلم يصيح إبنايبات الطف عمينه
إو سمع صوت أُم البنين إتصيح وين حسين وينه
يا بشر وضّحلي الخبر...وإخبرني بحسين إشصدر
ناداها شبلچ عالنهر...گطعو إيساره إو يمينه
صاحت فدوه لحسين إو وجوده...لو عباس تتگطع إزنوده
والچفين لتكون...وحسين السباني
* * *
يا بشر گلّي إشعلينه إديون وإستافت الكوفه
يا بشر صد إعله متني إو لعد حال الطفل شوفه
هذا إبن عينة بنيني إلعالنهر گطعو إچفوفه
لو چان أبو اليمه عـدل...ما دهري يتم هالطفل
يمكن عزيزي منچتل...إو گلبي چان إعليه خوفه
والحـال الطفل منمرد حالي...مسهر وآنه ساهرت الليالي
إو ما تغمضلي إعيون...وحسين السباني
* * *
يا بشر متنام عيني إو شابحه للطف تراها
إتفتش إبمصرع حسين إو مصرع حسين الدهاها
إو تصد نوبه إعله الشريعه إتريد سهم إللي عماها
إو هـذا الطفل حس إبهله...بأرض الطفوف إمچتله
إو دم الحسين إبكربله...فاض وإتطيب ثراها
إو طابت كربله إبدم الشهاده...وآنه حسين خلّف لي السعاده
أصبر والصبر عـون...وحسين السباني
* * *
