فجيعة أُم البنين
« شيعتي»
آنه أُم البنين إو فاجده الحيل...بألله إهنا يهل عدكم مچاتيل
هاكم دمعة العين...تضوي إبدم الحسين
بألله إهنا يهل عدكم مچاتيل
* * *
إهنا يهل عدكم ضحايا والمآتم ناصبيها
عله إمصاب إللي دهاكم يالأهل يمفارجيها
ساعدوني عله إمصابي وآنه أساعدكم عليها
تدرون بيه إملوعه...إبجمر البنين ألأربعه
وإچفوف عندي إمگطعه...إعله الشريعه إمگطعيها
هـاي إچفوف أبو فاضل تراهن...لحسين إو لعد زينب فداهن
إو عالمشرعـه الچفين...تضوي إبدم الحسين
بألله إهنا يهل عدكم مچاتيل
* * *
إهنا يهل عندك شباب إو عينك إعليه إترصّد
إتريد منه الغانمات إوبالخطر يلزملك الحد
مثل گلبي إللي تأمل ورده من شجرة محمد
هاكم دليلي إو حسرته...عألأكبر إيجر ونّته
وإبراسي اهجس طبرته...إو گلبي لمصابه تمر
منهو المثل گلبي إبفگد ينظـام...فاجدله شباب إثمنطعش عام
محزوز الوريدين...تضوي إبدم الحسين
بألله إهنا يهل عدكم مچاتيل
* * *
إهنا يهل عدكم شباب إو رايدين إتعرّسونه
إو عارضت عرسه المنيه إو گبل عرسه إتفارجونه
مثل عرّيس الهواشم بالدموم إتخضبونه
عرّيس جاسم حنّته...ما أدري من دم رگبته
لو من إجروح الصابته...إو عله الغبره إيوسدونه
ظلت بالگلب جمـرة إمصابه...جاسم حنته إو شمعة شبابه
تزهر بالصواوين...تضوي إبدم الحسين
بألله إهنا يهل عدكم مچاتيل
* * *
إهنا يهل عدكم رضيع إو يجذب إعله الماي حسره
لا لبن لا ماي يحصل وأُمه متحيره إبأمره
إتذكرو إمصاب الرضيع الخلّه بيّه إشلون جمره
أحّا يجمرة هالطفل...إبگلبك إو گلبي تشتعل
إشمطلوب ظامي ينچتل...إو نبلة الخيّطت نحره
إبگلب أُم البنين إشخلت إجـروح...تنزف من وريد الظامي مجروح
تتفـايض العينين...تضوي إبدم الحسين
بألله إهنا يهل عدكم مچاتيل
* * *
آنه ضحيت البنين أو ردت بس حسين يسلم
إو لا ردت سهم المثلث يمضي إبچبده إو تخذّم
إو من إصواب الحجر شيبه ما ردت ينصبغ بالدم
ضحيت إله إشبول أربعه...وإتفادو إبحد مصرعه
وإبأمره مو متورعّه...إو ما چنت بالحكمه أعلم
حكمه إو صـالح الحكمه إقتضاها...إو شرّف كربله إو تربة ثراها
من عالم التكوين...تضوي إبدم الحسين
بألله إهنا يهل عدكم مچاتيل
* * *
إهنا يهل عدكم عشيره إو چتل راحت هالعشيره
لا تفكرون إبأمرها وبالعيال المستجيره
إتصورو إعيال الحسين المشت مسبيه إو يسيره
إو خلت رجال الغانمه...إبحد السيوف إمخذمه
إو حيرة ودايع فاطمه...ما مثلها إتصير حيره
إو دم كل هاشمي إو مهجته إو روحه...تنزف من وريده إو من جروحه
ظلت بالميادين...تضوي إبدم الحسين
بألله إهنا يهل عدكم مچاتيل
* * *
إهنا يهل عدكم يتيم إو ما إله مشفج يعينه
ما يهم أمره إو يهون إبطفل حمّاي الضعينه
من عله إمتوني إيتجفل للطفوف إيدير عينه
إعيون اليتيم إمن السهر...ذابت إو روحه إعله النهر
وإتدور الهاشم گمر...بالسيوف إمگطعينه
بجنـاح المصيبه إيطير گلبه...وإعيونه عله حسين إتـّربّه
وإتجلب الكونين...تضوي إبدم الحسين
بألله إهنا يهل عدكم مچاتيل
* * *
