فجيعة أم البنين
«فائزي مذيل»
بألأربعه ضحيت...يحسين يعيوني
ردتك تظل موجود...سالم عليه إتعود
يحسين يعيوني
* * *
يحسين آنه أُم البنين ودهري ذبني...يحسين يبني
وعن البنين ألأربعـه إو عنك حجبني...يحسين يبني
آنه الخفت من كربله وگلبي لسبني...يحسين يبني
والكـربله إشوديت...يحسين يعيوني
خل گلبي عـاد إينوح...وإيحمل خمس إجروح
يحسين يعيوني
* * *
يحسين ربيت أربعه إبشحمة إعيوني...وما خيبوني
ظنيت بيهم بالوفـه وصدگت إظنوني...وما خيبوني
اليومك ردتهم وإبجهد يومك رضوني...وما خيبوني
ربيـت وإشربيت...يحسين يعيوني
أربع إبـدور إتنور...وإتجلت إبعاشور
يحسين يعيوني
* * *
من ودعتني وسدرت للغاضريه...وإصوابي بيّه
يحسين برسومك شفت علـم المنيه...وإصوابي بيّه
علمك لفاني وإنهدم بيتي عليّه...وإصوابي بيّه
وإنته عمـود البيت...يحسين يعيوني
من طحت طـاح البيت...وبترابك إتواريت
يحسين يعيوني
* * *
يحسين من ضعنك سـدر من المدينه...وإنگطع بينه
ظليت أحسب باليمر عگبك علينه...وإنگطع بينه
وصيت أبو فاضل يوافيك إبيمينه...وإنگطع بينه
وإبنصرتك وصيت...يحسين يعيوني
أربعه إتشيل الراس...عينتهم العباس
يحسين يعيوني
* * *
يحسين آنه أُم البنين إلمشو عني...وسهمك چتلني
لو چنت سالم ما ثگل عالراح وني...وسهمك چتلني
أربع إسهام إبچبدتي إو حيل إوجعني...وسهمك چتلني
وإبدمك إتحنيت...يحسين يعيوني
وإبگلبي سهمك طـاح...وإتگطع السباح
يحسين يعيوني
* * *
يحسين وآنه أُم البنين إللزمو الحد...والصبر يشهد
مو أعز منك لا وحگ جدك محمد...والصبر يشهد
مو عالبنين المصرعك گلبي تمرد...والصبر يشهد
أربع إسباع إنطيت...يحسين يعيوني
ما ظل عليهم لوم...أدّولك المرسوم
يحسين يعيوني
* * *
