أم البنين عليها السلام أروع مثل للوفاء
«إهجيني»
أم البنين إتنـادي...يبني إو يروح الهادي
ضحيتك إلك شبـاني...من حبك إو إيماني
يبني إو يروح الهادي
* * *
أربـع إبدور إو تزهر...وأنوارهم تتشعشع
إو من والدك هالزهره
إيردون وحشة حيدر...والگلب بيهم يهجع
والصعب يسهل أمره
والنصرتـك يمشكر...بثمار گلبي أتبرع
وإهديتهم للزهره
ردتك تردلي سـالم...وأحظه إبوجودك غانم
يا جوهرة وجـداني...ضحيتلك شباني
يبني إو يروح الهادي
* * *
آنه الـذي سموني...أم البنين ألأربع...إو بألأربعه إتفاديتك
والخلگ لو نشدوني...يافگد عندچ أفجع...من دونهم خصيتك
إو شابحه إعليك إعيوني...إو گلبي عليك إتگطع...وإعله ألأعز عزيتك
للأربـعه تسلاهم...روحي وأظن تنساهم
إو ذچرك إبطرف إلساني...ضحيت إلك شباني
يبني إو يروح الهادي
* * *
چانت تشوفك عيني...چني أشوف الهادي...وأتنور إبمصباحه
يحسين شيسليني...عگبك يريع أفادي...يالگطعت سباحه
يحسين لتخليني...گلبي يحن وينادي...مسلوبه منه الراحه
وجداني من وجدانك...عنواني من عنوانك
يالشيدت صيواني...ضحيت إلك شباني
يبني إو يروح الهادي
* * *
يحسين يوم المرَّت...من المدينه إضعونك...إو للغاضريه النيه
إو دمعتي إبعيني لاجت...إو شفت الخطر بعيونك...إوظليت أصفج بيديه
حسيت روحي إو گالت...عطشـان وإيذبحونك...وإعيالك المسبيه
وإنهدم عگبك حيلي...وإرعه النجوم إبليلي
وأتضرع إلديـاني...ضحيت إلك شباني
يبني إو يروح الهادي
* * *
إو عباس من وادعني...حب إيـدي إو حبيته...إو گلبي عليه يتلاهب
إو رفت الروح إعله إبني...والصدري من ضميته...وأدري بخوك إمعتب
وأدري إولـدي يسمعني...وإبنصرتك وصيته...إو يحفظ كرامة زينب
إوصيته يضحي إبشوفه...وإبرگبته وإچفوفه
وأدريـه ما ينساني...ضحيت إلك شباني
يبني إو يروح الهادي
* * *
يحسين أظـن ما گصر وياك راعي الرايه...إو ما ظن يصد عن دينه
للعلگمي من سدر...ما ظن شرب من مايه...گبل العزيزه إسكينه
چني أشوفه إمعفر...إو مرمي إعله المسنايه...والسهم ماضي إبعينه
إومـا گصر إبمجهوده...إوما عز عليك إوجوده
وإبنصرتك وافاني...ضحيت إلك شباني
يبني إو يروح الهادي
* * *
ظليت أحسب بأمرك...وإبگلبي رمي إسهامك...لنك رميه إگبالي
چن الشمر حز نحرك...وأسمع صريخ أيتامك...وإتگطعت آمالي
إي وحگ رضة صـدرك...نار الدوت بخيامك...بيها إحترگ دلالي
نار الخيم من وجت...لأرض المدينه إمتدت
وآنـه إسعرت نيراني...ضحيت إلك شباني
يبني إو يروح الهادي
* * *
