الشهيد ألأول مسلم عليه السلام
« شيعتي»
للمله والدين...شد بألله العزم
مسلم لبس تاج السعاده...بإسم الشهاده
* * *
همت والمسلم هيامي من عليه جارت الكوفه
وإنكشف عني الستار وعين إيماني تشوفه
حر عله الميدان حوّم غاص بموسط صفوفه
وأسمع صهيل إمهنده...بالطـوس إله رنه وصده
هاشمي وشدة ساعده...ماهي منكوره إمعروفه
بموسط الكـون...ثابت له جدم
والثبّت أقدام إعتقاده...بإسم الشهاده
* * *
شبچت إرماح العوالي زور وبحدها المگدر
والسيوف إيوج سناها ومن سنها النار تسعر
وچني إبمسلم نحرها إبگلب بي إيمان حيدر
وإعله الدرع ذب الگلب...والموت من سيفه يصب
وإتملك إزمام الحرب...ملك وإبعرشه تسّدر
واليصعب إيهـون...بأمره وبنحسم
وينفـذ إبسيفه ألإراده...بإسم الشهاده
* * *
إتمثلت مسلم ولامة حربه وأفعاله الحميده
فوگ لامة حرب مسلم شاهدت لامه جديده
الطاس توفيقه ودرعه البخت والدرگه العقيده
والهمّه همّة عاطفه...والراي نبراس الوفه
واليوصل الغايـه إكتفه...وصل والغايه سعيده
عاشگ ومعشوگ...ويَّ الغانمه
متحمس إبعطفه إو وداده...بإسم الشهاده
* * *
يا هله إبضنوة عقيل وهمّته إو ساعده إو باسه
درس دستور الفراسه من علي رب الفراسه
وجمرة الحمزه إبوجوده فوّرت دم الحماسه
وإبعمه جعفر يرتجز...وشان الفرع ما ينفرز
من أصله والماضي حرز...والنصر تاج إعله راسه
والماضي بالتاج...وسام وجوهره
وإنصاغت إبإيد القياده...بإسم الشهاده
* * *
هاك إخذ تاريخ مسلم يهالرايد تستمّله
شد وسام النصر لاچن گبع الكوفه إبمذلّه
إبكثر ما طلبت النجده صابت إبن إزياد خلّه
صـاح إعله گومه إشهالجزع...ما يلحگ إعليكم فزع
مسلم إبهالكوفه إشصنع...وإبن ألأشعث رد يگلّه
خو ما هو بگّال...كوفه وينثني
هذا نقيب أهل السياده...بإسم الشهاده
* * *
لا تگول الكوفه نحرت مسلم وشبچت يمينه
هذا مرسوم السعاده چان مكتوب إبجبينه
مسلم إچفوف الشهاده غمضت عالموت عينه
عالقبله سعده مدده...وإلسان صدقه شاهده
والعهد من حل موعده...مسلم إتهنّه إبيقينه
وإتغسّل إبفيض...دم المكـرمه
وإتچفن إبخلعة جهاده...بإسم الشهاده
* * *
إبناظر إلبي شفت مسلم للحرب داير مداره
شفته متگيد إبحلمه إميسر إبقصر ألإماره
وطلب شربة ماي مسلم يطفي من الگلب ناره
جابو الماي وما برد بي گلبه...من دمه إشفافه الفجر من الضربه
حرَّم الماي وما تهنّه إبشربه...وروه إبچاسات إنتصاره
تـاجر إويا حسين...وربحت تجرته
واحد إبسبعين ألإفـاده...بإسم الشهاده
* * *
إيكون مثل حسين مسلم ظامي گلبه ويذبحونه
ولعد عالي الگصر لمن صعد والسياف دونه
إيفكر بأمر الحسين وفجرت دمعة إعيونه
وأعظم مصيبه من عگب ما ذبحـوه...من الگصر للدرب جسمه ذبوه
بالكوفه مسلم بالحبال إيسحبوه...ما دريت إشيطلبونه
وبوحدة الدين...مسلم متحد
وإتمسك إبحبل إتحاده...بإسم الشهاده
* * *
ما تشيع نعش مسلم يالعلي وألله إشهضيمه
إو ظلت المسلم وديعه عند أبو اليمه يتيمه
من دره إبچتل إبن عمه وإنرمه بسهم الظليمه
صـاح إعله زينب وإنفجع گلب حسين...يختي يزينب بالخبر ما تدرين
ربي يتيمة مسلم إبماي العين...وإغتنم مسلم غنيمه
وبرمز العلـوم...مسلم مجتهد
وإنطوه إعله الجنه إجتهاده...بإسم الشهاده
* * *
سلم الطفله بديها وصاح والونه خفيه
يختي هاي أول يتيمه من يتامه الغاضريه
وهاي بنت أول شهيد إو وصي بيها الفاطميه
وتيتمت عگب الحسين إسكينه...يا ريت أبوها حي تشاهد عينه
حالة إسكينه وعزها المسلبينه
* * *
