وصل مسلم غايته...بالحسين إونصرته
شد وسام ألإيمان...والشرف والوجدان
بالحسين إو نصرته
* * *
أول شهيد الكتبته أقلام الدين...والحبر دمّه
مسلم الصدق عهده من التكوين...وي إبن عمـه
أفداه النفس لحسين وأنصار حسين...وافت الذمه
لعد مسلم تبعته...إو بالشهـاده واسته
وأثگلت بالميـزان...والشرف والوجدان
بالحسين إو نصرته
* * *
دسمع إبمسلم وإبجلالة معناه...وإبغانماته
لحسين رب الكون صفوه إستصفاه...حسن صفـاته
أده الرساله وإبصحيفه إمن إدماه...سجل أداته
والرسـاله التأييد...للعدل والتوحيد
والعمل عالقرآن...والشرف والوجاد
بالحسين إو نصرته
* * *
دسمع محاسن مسلم إو تصميمه...إوشرعه إو نظامه
عالم إبأمره إو مدرسة تعليمه...دار ألإمامه
حكّم السيف إو عالعدل تحكيمه...إو صدر أحكامه
إنشد الكـوفه إشذبح...منها والصارم نجح
إو سيطر إعله الميدان...والشرف والوجدان
بالحسين إو نصرته
* * *
يا صاح إنصف وألأنصاف إيحجّيك...من يحكمونك
وإنشد إمن الكوفه وأهلها إتدليك...إومن يخبرونك
وإدرس حرب مسلم إو حربه إيهنيك...ينعم إعيونك
مسلم إبهمة گلب...سير أفلاك الحرب
وإبيمينه السكـان...والشرف والوجدان
بالحسين إونصرته
* * *
صد إبّصيره وإبصر وإتورع...والحگ تشوفه
وإتشوف مسلم بالشهاده إتدرع...شد عله الكوفه
إو شوف الزلم تتجمع إو تتوزع...والحد تعوفه
مسلم إبحد صارمه...عجب أملاك السمه
من حمل عالفرسان...والشرف والوجدان
بالحسين إو نصرته
* * *
سياف والسيف إنطوه إبطي يمناه...إو ركز قوامه
مسلم إو يثگل عالحرايب ملگاه...بألله إعتصـامه
وصف ألأمير إبوصف مسلم تلگاه...وأخذ العلامه
من بسالة سـاعده...والمواقف شاهده
إو تعلم إبعمه إشچان...والشرف والوجدان
بالحسين إو نصرته
* * *
لا تظن مسلم من الكـوفه إتأثر...إو گصّر جهاده
لاچن دناه أمر العليه إمگدر...من ألإراده
مسلم إبميدان السعاده إتگنطر...بإسم الشهاده
إو سجـل إبهالتضحيه...صالحات الباقيه
من رضـاة الرحمان...والشرف والوجدان
بالحسين إو نصرته
* * *