موقف مسلم بن عقيل عليه السلام
«العجز هجري + حسيناوي»
من شـره إو باع إو باع...مسلم إبيومه
بـاع مسلم عالحرب...گطرة الدم إبصاع
مسلم إبيومه
* * *
هذا بيع الظاهري إوربح مسلم بيه...إو برز عنوانه
بعد باع إو مشتري باطن إو يكفيه...عقد إيمانه
إو صبح غانم مكتفي والصمد چاسيه...حلل رضوانه
المسلم إمن التكـوين...حلل مقسومه
بيها بالكون إنچسه...إو خامس أصحاب الكسه
مشتري الكل بيّاع...مسلم إبيومه
* * *
إسباع سوگ الملحمه إسيوفها الميزان...والبضاعه إدموم
والربح بالغانمه والجُبن خسران...بالعدد معدوم
إو مسلم إبحد صارمه ربح بالميدان...وأخذ بيه إعلوم
معرس إبصهوة كـون...إو حنته إدمومه
إوعد عله غيد الوغه...إنثارها إچفوف الطغه
والمهر روس إسبـاع...مسلم إبيومه
* * *
درنگ الكوفه ثگل إو مسلم إتلگاه...بالوجه زمّه
إبساعد الهمه نگل إوما گصر وألله...سـاعد الهمه
بيدر الشوس إو شكل إو كل أسد خلاه...يفحص إبـدمه
إو ينثر الروس إبروس...سيفه بالحومه
إو سيفه نقمه دامغه...الدرنگ الكوفه إدمغه
إو روّع الما يرتاع...مسلم إبيومه
* * *
مسلم إجتاز الطعن إو يسحگ المطعون...وإيعدي إبـزوده
إو مثّل الهدّم حصن خيبر إو بالكون...جسّم إو جوده
إو ما خطه بيه اليظن موسه والفرعون...دمّر إجنوده
إو دز ألأشعث فزّاع...وإفزعت گومه
إشما ثبت جدم الفزع...خضه مسلم وإنشلع
إو سمهريه الشـلاع...مسلم إبيومه
* * *
إو من تصير الصكصكه للبتر والميد...الكون يتورع
للأشم إيدكدكه لو صرخ ويعيد...صرخة ألأنزع
إشلون صرخه إمباركه خرست أهل الويد...إو طـرشت المسمع
راجل إو خله الخيل...شاة منجومه
والرجال إمصگره...من وحيف الگصوره
تـود تبلعها الگاع...مسلم إبيومه
* * *
بإسم الحسين إعتمد وإعتماد حسين...صارم إو ساعد
نامت إعيون إبرغد وإعله ردن الدين...يغمض الماجد
وأخذ مسلم بالجهد عزة الدارين...والجهد خالد
مسلم إو بألإسلام...تـزهر إرسومه
والحسين إمعينه...نائب إبهالسلطنه
إو يـذب عنها إو منّاع...مسلم إبيومه
* * *
مسلم إبجهد إعتقد والجهد ينباع...عاليقدرونه
إبمصرف العصمه إنرصد جهده بستطلاع...عوض ينطونه
بالخلد يوم الوعد چيل صاع إبصاع...عوض ينطونه
وألأجـر من حسين...نفذ مرسومه
لعد مسلم منذخر...عد رسول ألله ألأجر
والثمـر للزرّاع...مسلم إبيومه
* * *
