مسلم لفه الكوفه إو نزلها النفل...لاچن عليه حسين گلبه وجل
* * *
مسلم لمن شد الرحال إو ضعن...من المدينه إو هجر عز الوطن
للكوفه طب وطلعت أهل الفتن...صف إعله صف متراكم إو متصل
* * *
جابته إبعز إو خلفه إملفلفه...إو نزلته إبكوفتها إبكمال الصفه
أهـل الخديعه العيب عدها الوفه...إو مستارثه الباطل نسل من نسل
* * *
گالو الكـل حيك عدد ما مشيت...رحمه إو من الرحمان لينه هويت
وأثمارنه أينعت بس ما لفيت...نعمين دُرَّك شبل سيد الرسل
* * *
گلهم رسول آنه من إبن الرسول...إلكم بعثني شبل فحل الفحول
آخذ البيعه إو خلفي إبن البتول...للكوفه يلفي إو يحط بيها النزل
* * *
گالوله يا مسلم يليث العرين...إنبايع إو كلنه الطاعتك طايعين
لاچن نود نحضه إبسليل ألأمين...نتمثل لأمره إو نود دونه إلچتل
* * *
يبن الضيـاغم نعم حق اليقين...هوَّ السبيل الرشد للمسلمين
هالحين والدين الحنيف المبين...هوَّ القواعد والفرع وألأصل
* * *
إثمانين ألف إلبايعو للطهر...لاچن عله حيله إو دسيسه إو مكـر
إيمانهم داوم الفرض الظهر...خانو إبمسلم وإتبعو للنذل
* * *
إنچان گالوله يمسلم تريد...إمن الچتل تنجه إو عالكـوفه تسيد
إرفض شبل طه إو بايع يزيد...تتوله أمر السلطنه إو ما تذل
* * *
گلهم معاذ ألله من الجاهلين...أصبح وأنه المنسوب للطاهـرين
سادة الكون إو عصمة المتقين...إلبيهم رفع شنيار دين العدل
* * *
ما فاد بيها العذل كلما عذل...سل صارمه إبيمناه ضاري إو حمل
لتگول طاعون إو عليها نزل...والموت من يگرب إحدوده إو يصل
* * *
من شاف أبو طاهر جيوش الطمع...إتناخت عليه والفزع يتله الفزع
إبهاشم تچنّه الهاشمي وإنتشع...وهالچيف حرب الهاشمي ينحمل
* * *
ضهضب غضب دمـدم هجم عالعده...طاعت أرواح الگوم لمهنده
وخله الطواغي إعله الثره إموسده...إبكل دار دمع النايحات إيهمل
* * *
لولـه المگدر والحفيره السبب...ما چان كـوفي دنه الزاچي النسب
إو لاچان دمه ينسفك وإنسحب...ويلاه بعجود المشومه إبحبل
* * *