الحر الرياحي بين الجنة والنار
«شيعتي»
تاريخ ألأحرار...بالدعوه الحسينيه
حر الريـاحي إبكربله...مثل ألأحرار
بالدعوه الحسينيه
* * *
بين جنه ونار چنه وإنقسم أمرين أمره
وأدركه نور الهدايه وحسّن التوفيق فكره
طلع من نار المسعره ودخل بالجنه المزهره
حفـز الميمون إو لكد...لخيام أبو اليمه گصد
والنصرة الدين إستعد...نوّر ألإيمان صدره
وبضوه إلإيمان...تتشعشع معانيّه
وإللي يريده حصله...وشارك ألأنصار
بالدعوه الحسينيه
* * *
هاجت إبجسم الرياحي شيمته ودم الحميه
وخله مرآة ألإنصاف إگباله والفكره القويه
طلّگ الدنيه إو هواهه إو عقد حورية المنيه
وبوجهه من لاح السعد...ناداه صدق بالعهد
وإمشي عله ضي الوعد...وإرضي الباري ونبيّه
شوف السعد شوف...للحر نـوّر أفكاره
والمنقسم ردّ إلهله...وإعله الوعد سار
بالدعوه الحسينيه
* * *
وگف متچتف وسيفه إبرگبته وبالحگ تشاهد
مذنب ونادم تراني إي وحگ جدك محمد
وإگصدت وافد تراني وإنته للوفاد مگصد
يحسين رد لي لهفتي...يحسين عدل زلتي
يحسين عف عن سايتي...وإلتعف عنه تأيد
ناداه الحسين...إبشر وإنعم إعيونك
من ساعة الگالو بله...سجلوك خطار
بالدعوه الحسينيه
* * *
بشر وإستبشر الحر وصاح يا والد اليمه
عبدك التعتگ رگبته ما يعز إعليك دمه
إرخصني للميدان أريد الگلب زينب أجلي همه
وأنعم نواظر فاطمه...وأتحنه للموت إبدمه
وإللي يريد الغانمه...ما يظل مگيود ذمه
واليحمل السيف...كون إيأدي مرسومه
ويتسنم العز والعله...وإيخلد آثار
بالدعوه الحسينيه
* * *
أخذ من حسين أمر الحرب وإشتد عالملازم
صكّت إبوجهه الرماح وهلهلت بيض الصوارم
وصاح أنه الحر الرياحي وأصبحت لحسين خادم
واليخدم إبيوت الشرف...بفعال محموده إنوصف
والمسكن بأعله الغرف...لليحامي إبيوت هاشم
وأحـرار البيوت...كون أچسب مراضيها
والموت برضـاها إيحله...وآخذ الشنيار
بالدعوه الحسينيه
* * *
إشما عذل بالكوفه عيّت تمتثل أمر ألإراده
لبس فوگ الدرع گلبه وزرّه ببنود الشهاده
وقائد ألأرواح سيفه إو حلت للسيف القياده
مد رمحه بعيون الحرب...دم ودمع گـامت تصب
ذب الجنح فوگ الگلب...وإنشكر سعيه وجهاده
وإحتـارت الناس...بأسراره وبراهينه
گالو الحر إشبدله...وأظهرت أسرار
بالدعوه الحسينيه
* * *
بإنتصار حسين للحر أظهرت للنصر آيه
باح للإسلام دمه وشهد صارتله المنايه
تاجر وربح التجاره عقد جوهرة الولايه
ومصابه لحسين أفجعه...وحسين سـار إلمصرعه
ضمّه إلصدره إو ودعه...ورشحه بنور الهدايه
يا حر ينـاديه...أُمك ما خطت بإسمك
جامـع صفات الكامله...وإسمك علم صار
بالدعوه الحسينيه
* * *
