حبيب الحسين وألأنصار
«شيعتي»
حورب حبيب إو صاح...يهل الديانه
يحيى إو يمـوت إبكربله هالدين...وحسين وجدانه
* * *
صاح يرباب المعالي إو راية العليه نشرها
فرشت العليه ردنها إو وين الينام إبحجرها
إتريد من عدكم رباها يالربيتو إبثمر دُرها
حين سمعو...صوتـه نهضو...بيض شهرو...سمر شرعو
من تنـاخو...جلو للغايه كدرها
حيو عجيد الراي...حياهم ألله
عيناك يا ميـر العلم عيناك...نادوه فرسانه
* * *
نسجو إدروع الفراسه إو بالفراسه إتوشحوها
طوسهم توج الشهاده إو بالشهاده إيتوّجوها
والبراجع هيبة ألله إبسر من ألله إتبرگعوها
إشلون نخـوه...إو نهضه حلوه...العزم يگوه...إبحمه الصفوه
طيور شلوه...إو للجياد إتخيلوها
گامت الخيل إتجود...جيده إمن أصلها
وكل جيد إيجول إو يشوف الموت...منسوج بعنانه
* * *
من أشراف العرب صفوه الباري لحسين إصطفاهم
إتعاضدو فزعو تناخو حيهم إو حي النخاهم
هز حبيب اللوه إو هز الكون من إهتزلواهم
العلم يعله...باليحمله...وإيتحله...إبعز محله
إبهمة أهله...وأهله دين ألله إبحماهم
من إستجار الدين...بيهم تأيد
ومن ثبتو إبطف كربله للديـن...ثبّتو أركانه
* * *
هاي من همة حبيب وشالت إهلال الحميه
من عليه مر أبو اليمه نهض وبذيج المسيه
طلع خلف حسين ناده إهلال يا روح الزچيه
شنهو گصدك...نجد حدك...وآنه عبدك...دون حدك
وحگ جدك...لرضع إبثدي المنيه
يبن اليحامي الجـار...زودك حمانه
وإحنه بحماك إو راية ألإسلام...يحسين بحمانه
* * *
بالخيم گام إيتخطه حسين وهلال إبخدمته
وصلو الصيوان زينب شكر من إهلال همته
إتوادعو وحسين طب إعله الخدر يتفگد إخته
گعد عدها...سور حـدها...إستر چبدها...إو كل گصدها
من سعدها...تختبر موقف صحبته
يبن أمي گلي إشلـون...موقف اصحابك
تثبت إبحـدك للطعن بالكون...لو عمر ميدانه
* * *
گال أبواليمه يزينب راي گومي ما إيتبدل
صحبتي إرجال الكريهه إمن الكريهه متّزلزل
ولن يصيح إهلال خلف الخيمه نفعل وألله نفعل
وإنتچنه...وإنتهنّه...إبعز نزلنه...إو دون أهلنه
إرماح إلنه...تنشرع وسيوف تنسل
وسور إليگف بحـدود...خدرچ يزينب
إصدور ألأنصار إو تشگف إمن الگوم...حرة الطعّانه
* * *
دبَت بهلال الحماسه وإبحماسة عزمه فزّع
وصاح يبطال الفراسه إو يا صناديد المصارع
الموت دون حسين يحله وحد خدر زينب المصرع
والضياغم...بالعزايم...والصوارم...والمحاشم
للعمايم...ذبَّت إوجتـّه إتفازع
يالحشمت فرسـان...يعرب علامك
گلهم بنات المصطفه إمن الگوم...مرعوبه ولهانه
* * *
هللو كبّرو نادو يا كريمات الهواشم
إرماحنه إبصدر اليضدكم تنثني إو هاي الصوارم
إمجرده إمن الغمد عيّت إلاّ تغمدها إبجماجم
الحومه جنه إدمـانه حنه...وإنتمنه...إنموت كلنه
وألأسنّه...جِنه...إو جندال الضياغم
وإطلعت للأنصار...زينب تنادي
جـدي الجهدكم ضمن عالمعبود...جنّته إو رضوانه
* * *
فعلو الگالو وأزيّد من ضحت والكون زمجر
صدگو عهد أبواليمه المنعقد من عالم الذر
وإفرشو ردن الشهاده إو نامو إبحجر المقدّر
وظل حسين...يجري الدمع لأنصاره
چبده إيفور...والعطش وجّر ناره
هاي أحكام...صدق العهد وأسراره
لوله العهد ما سلم ألأنصار...لسيوف عدوانه
* * *
جاهدو گبل الشهاده إو جاهدو عند الشهاده
إبمسلم ألأسدي توضّح هالجهد معنه العباده
عدل جاهد ميت جاهد في سبيل ألله جهاده
دون حسين...مسلم بذل مجهوده
من حي چان...ما عز عليه إوجوده
وعند الموت...بوصيّته مگصوده
هذا الجهد ينذكر بالتـاريخ...لله عنوانه
* * *
مسلم إيجود إبمهجته إو ينتبه وإتغيب روحه
وبالنزيف أتفيض نفسه من يفيض إدماه موحه
شاف أبو اليمه إوحيب إتودعه إتجلب إجروحه
ومن هالحال...مسلم تضايگ صدره
إبگلبه النار...والجمره تلذع جمره
صـد لحسين...وإينادي يابن الزهره
فگدك ضهدني إو وجـدك البحشاي...شيطفي نيرانه
* * *
گعد عد مسلم حبيب إورفع راسه إمن الوطيه
إيحن عله إمصابه إو ينادي إو يجذب الونه خفيه
يا عضيدي إمودع ألله گلي إشعندك وصيه
مسلم صاح...هاللةٍ هاللّه بحسين
إو دمه إبفيض...عالغبره وإتهل العين
الدين الدين...هُمُّوله يرجال الدين
إلما يثبت إبحـد الطعن للدين...ما ثبت إيمانه
* * *
صد لعد مسلم حبيب إو صاح يالطيبه سجيتك
گطعت سبّاح چبدي إو مرّدت گلبي إبوصيتك
وألله لتجرَّع منيتي مثل ما تجرع منيتك
دون حسين...مثلك لضحي إوجودي
إبفيض إدماي...مثلك لعفّر إخدودي
وألأنصار...مگصدهم إو مگصودي
مصرعنه حـد إمخدرات حسين...وأللحد تربانه
* * *
