نداء حبيب بن مظاهر رضي ألله عليه
«العجز هجري + حسيناوي»
صاح إبن ظاهر صاح...والفلك داره
يالدرت هذا الفلك...دونك إتموت أرواح
صاحت أنصاره
* * *
حورب حبيب إو هـز رايته...إبهدوه من الليل...وأزهت إرسومه
يالعهدكم ساعته...دنت لوح الخيل...صدر مرسومه
إبشر إبشر حيّته...إو صكـو إبتهليل...يا هله إبيومه
والوعد ما ننساه...إو نحفظ أسراره
ونشرب إبچاس الوعـد...من شهادتنه الشهد
والنصـر چوچب لاح...صاحت أنصاره
* * *
يا حبيب إبدعوتك...بيها مدعوين...وإبمعانيها
وإبذممنه إو ذمّتك...واجبـات الدين...حگ نأديها
شد هممنه إبهمتك...لإنتصار حسين...وإخذ صافيها
وإحنه النهدم الكـون...وإحنه عمّاره
بالمعاره الداميه...عالشهاده الساميه
نركـض إبغير إسلاح...صاحت أنصاره
* * *
بالنصر بالظـافره...إو يا مشاهيبه...شنهي نومتنه
وبالخدور إمخدره...أمست إبريبـه...حرم سادتنه
جاوبوه المسهره...إبساعة النيبه...إتشوف همّتنه
لو ضحت وأضحه الكون...ننزل إبداره
إنحدد إحدود الخيم...ننعم إعيون الحرم
لو صبـح هالمصباح...صاحت أنصاره
* * *
يا مسانـد رايتي...وزهرت ألإكليل...من مناظرها
گومو نفـزع يخوتي...الزينب إبهالليل...نسر خاطرها
وآنه أقـدم رگبتي...إو عن گلبها إنزيل...كل مخاطرها
والخدرهـا إبهالميد...نضرب أستاره
وخل تهيد إمأمنه...إمخدرات السلطنه
إو گلب زينب يرتاح...صاحت أنصاره
* * *
نگلو إجـدام الهمم...والهمم نبراس...نور يهديها
وصلو إحدود الخيم...وعلت صيحة باس...حي أهاليها
ولن تنحّرهـا العلم...يرف للعباس...مجبل إعليها
علم وإبراسه الـزود...تلتهب ناره
إو صاحت الصفوه نود...نخدم إبيوت المجد
يا گمرنه الوضّاح...صاحت أنصاره
* * *
يامن إلهـاشم گمر...ليك متعنين...من حميتنه
حين وافانـه السهر...هجنه مهضومين...إو سر مصيبتنه
ندري العيال إبخطر...ما تنام العين...وإلها فزعتنه
هألأمر صاح إيهون...وأكشف أخطاره
ندري كافل هالنزل...ولو گلت گول إوفعل
إوبحـر زودك طفّاح...صاحت أنصاره
* * *
إو زينب الكبـره إطلعت...لبن والدها...إو لزمت الرايه
خويه ألأنصار إگصدت...شنهو مگصدها...إبليل عنّايه
إو من خدمها إتشكرت...ولعد قائدها...قدّست رايه
والعجيد المغـوار...شهر بتاره
إو صاح يا بت فاطمه...بحنه للدين الدمه
وبحماكم ينبـاح...صاحت أنصاره
* * *
