حبيب وطلاب الغانمة
هـاجت إسباع الكون...للغانمه يردون
من هز حبيب الرايه
* * *
صفّت سبايه الزود...والعاديات الفّرَّس
إبجو الحماسه إتجود...بغيض وغضب تتنفس
إشما تنصرع وإتعود...وإعله الگصد تتحمس
ما تنصرع وإتهون...وتناهمت عالكون
من هز حبيب الرايه
* * *
هذي سجايـه الخيل...وإسمع همم فُرَّسها
عالغانمات إتميل...لو حشم اليرأسها
وتنسج من التهليل...لامة حرب تلبسها
بالعـاطفه إيهيجون...مثّلو هالمضمون
من هز حبيب الرايه
* * *
من صفّت الرايات...عزم الملازم همهم
من ذاري الغارات...جو الحرايب غيّم
من عبست الحالات...ثغر الفراسه إتبسم
وتظاهر المكنون...وتصفّه كل مرجون
من هز حبيب الرايه
* * *
صـارت إعجود الميد...وي الأعنّه إملازم
ضاگت فجوج البيد...إمن الفازعه التتهازم
وأگصرت إيد إبإيد...دارت أفلاك العالم
وحـدر الطاعون...من جو عذاب الهون
من هز حبيب الرايه
* * *
وإتزوهـر الميدان...من حربـة المسمومه
ما گلب للشجعان...ظل ثابت إبملزومه
خفگّت بالجنحان...وإتطايرت بالحومه
وج للخطر چانون...وإستحضر المسكون
من هز حبيب الرايه
* * *
زاغت إعيون الشوس...من صك حريب الريبه
وخف الثگل بالروس...منها بسموم النيبه
وإلحفظت الناموس...للخلد نشغت طيبه
وإلكدو يتحادون...بالنصره يتناخون
من هز حبيب الرايه
* * *
صفـوة شرف سبعين...من نشأة العمّاره
رسمو شبح للدين...ما يندرس آثاره
گرّت إعيون حسين...همة زعيم أنصاره
شـد للشهاده إضعون...وگر للديانه إعيون
من هز حبيب الرايه
* * *
