نخيت وجاوبت عونك...أنا الما خيب اظنونك
حياتي فدوه لعيونك...حُسيناه
إلي بقلب القصر ضجه...رغم جوره ورغم نهجه
لقيت اسمك عليه حجه...حُسيناه
***
دخلت الكوفه ما قلت الحذر واجب...على وجهي ملامح زود أبو طالب
سفير الثورة رحت الدولة الناصب...أسألهم أما للحقِ من صاحب
عدوي اتحير بأمره...خشب حكمه وأنا الجمره
أنا الهم الشغل فكره...وتحداه
رعبت الحاكم الظالم...بده يحس الخطر قادم
وعدتك ما أرد سالم...حُسيناه
*
دخلت وخصمي جان امحصن بشركه...مثل دخلت محمد من فتح مكه
أدور والحقيقة اخيوط مشتبكه...رسائلهم خداع انكتبت بحبكه
أنا بين الوجوه أسأل...اگـللهم حسين أقبل
ردت كلمة صدق تحمل...مواساه
گـصصـهم ما رضت تعرق...جفوا واتبروا من الحق
وأنا بكل نفس أشهق...حُسيناه
*
اليلاقيني بدت تتغير ألوانه...يحذر من مشيتي الساد بيبانه
وعدهم ذاك يا وسفه بخبر كانه...يا هوه الأذكره يقلي مو آنه
خلف وعده ونسه الجلمه...الوعدنه يبايع ابدمه
بعدما جف حبر قلمه...تناساه
خذل دينه وطوه الصفحه...ضميره الما قبل يصحه
رغم منك طلع صبحه...حُسيناه
*
غريب وصرت أشوف الموت عنواني...بقه دين ابرقبتي موقف الهاني
خلت بيَّ الدروب ابين عدواني...يميز حيرتي المن وجهي يقراني
سكن ليلي وطفه اشموعه...عليَّ الخطوه ممنوعه
يواسيني صبر طوعه...عله الآه
كثر چـانوا وأنا الوحدي...كأني الكل نفس جندي
يسألوني وقلت ردي...حُسيناه
*
هجموا بس تناسوا واجهوا قائد...ميداني المراجل كلشي بيه وارد
تعّبت الجحافل والمدد شاهد...حته من أخطي واحد ينجرح واحد
ترجوا للحرب هدنه...وأنا من آل النبي وعدنه
نأمن حته بالضدنه...عرفناه
مثل تكفير ابن ملجم...مجرم يهمس المجرم
وآنا ابينهم مسلم...حُسيناه
*
حته امن أبعد يضل صبرك ببالي...يا ريت أقدر أحمي ظهرك الخالي
إلي يمك طلب و أتمنه يجرالي...بعد يحسين ما وصيك بأطفالي
بحساس الأبو تدري...أريد أحضنهم الصدري
لكن سلمت أمري...إلى الله
إذا تنظر طفل وحده...وحيد ودمعته بخده
بس اسأل أبو عنده...حُسيناه
*
رغم الموت لكن فكري ظل يمك...يتروالي بحوافر خيلهم دمك
إذا وحدك منو باجر يجر سهمك...لعطرك من يوصل نفسي وأشتمك
أنا الأجلك نذر عمره...يوارث هيبة العتره
أنا الوجهك ألف ذكره...إلي اوياه
سلامي الكل جرح عندك...أسلم وأنتظر ردك
يمن باجر تظل وحدك...حُسيناه