اكشف سواد الطف ضوه...و اجرح ظلامه
و اسرج جوادك للحرب...و احكم لجامه
وجه المنايا انطيه امر...يفتح لثامه
و بحرقه سل من الغمد...يوم القيامة
يم الفرات ثبّت علم...موطئ قدم... واطلق سراحه
امطر حياة...و احضر مدد...يم كل جسد ..ثقلت جراحه
يا فارس أعلن موقفه...عطّر تراب الطف وفه
هب بعدوك عاصفة...و ذوقه العواقب
لم الجموع المذنبة..و رمحك يحاسب
انت بقواميس الثأر...اخطر محارب
ارفع يمينك للسمه...ولوح الكواكب
ابرز مثل وجه البدر...لحظة تمامه
كل لحظة بيك يحلم طفل...يا بوالفضل..ما تنسه حاشه
ظلت عليك عين الخيم...من انهدم..حيل العطاشه
يالمعتني الماي بقصد...السجدة عطشت و الحمد
جم نظرة تنتظرك ترد...تحيي الأماني
انت بخلق وقت الوفه..جنت الثواني
قلك خلص دوري القدر ..و انت بمكاني
سيفك محامي الزلزلة..و سبع المثاني
بالطف كتاب الله أُمر...تحرس كلامه
يبقى الحسين يشتاق لك...يتأملك...دمعه بصلاته
الله اليعين جفنه الخله...و صوتك مِله..كل ذكرياته
كلما صلت صولة جزر...زينب على بالك تمر
رادت وعد غصن النصر..ما يبقه ذابل
ال بالحرب يتخيلك..لمن تنازل
يفهم بان الله أُمر..يبعث مقاتل
كل ضربة يهتفلك علي..اي يابوفاضل
انت الغيور اليحلف..الموت بحسامه
بين السيوف خُط ملحمه...من الدمه..بهيبة نزالك
وصّي الجفوف توقع حذر...خاف الخبر..يوصل عيالك
مر النهر و انت العذب...يثني السهم جفنك صلب
جمرة الظمه و قلبك عشب..يحرق لظاها
جرد قوانين الحذر..من محتواها
كل رية تشهك خطوتك..يخلص هواها
رهبة نظرتك تذبح ال..يدخل مداها
نيزك يمينك لو نزل..يترك علامه
