بطولة ألأكبر عليه السلام
«ميمر مذيل»
شد عله الخياله...والنصر يبراله
حيدر إبعينه...وإبميادينه
من طلگ عساله...والنصر يبراله
* * *
من شد ألأكبر عالمهر وإتعلاه...وأنشر الرايه
إوسيف الشطر مرحب يلوح إبيمناه...للرايه آيه
إو طاف إعله المخيم إو رزينب ترعاه...منعجد رايه
عالحرب وأخطـاره...وإلتفح بأثماره
إو جمـرة الهمه...فورت دمه
والهمم فعاله...والنصر يبراله
* * *
كد المهر وإتعلگت بي گلبين...وإتباري ألأكبر
مسرور گلب الوالد إو گلب حسين...ببنه إيتبشر
إو من العقيله زينب إصبي العين...للحومه سدر
عالثمر تتنوع...والثمر يتشعشع
إبنور قدسيه...إو سعد روحيه
إيهلهل إمن إهلاله...والنصر يبراله
* * *
من جرد الصارم إبچف الوجدان...تجدح أشفاره
والرايه منشوره إعله متن ألإيمان...تنشر قراره
ومن عزمه نزلت صاعقات الميدان...وأسعرت ناره
والرمگ عگرها...والزلم دمرها
إو هاجت النيبه...إو دهشت الريبه
إعله الحرب منهاله...والنصر يبراله
* * *
إو جـو الحرايب يلهب إبنار إو نور...للحكمه عينه
والنور من شمعة كتاب المسطور...شع من جبينه
والنار تلهب من أثرها المأثور...صارم يمينه
من محمد نـوره...إو من علي دستوره
والفرع زوده...إو ثمر مجهوده
يرجع الآصاله والنصر يبراله
* * *
إو صاحت رجـال الحرب صيحة عجزان...إلمن إنحارب
إنحارب محمد لو علي إو بالفرسان...ميغلبه غالب
وهذا ألفته سياف ماضي إو طعّان...بالطعن ضارب
بالطعـن روّعنه...إو بالطبر جزعّنه
هاشمي إمعرّب...مربّى ومدرّب
عالحرب وأهواله...والنصر يبراله
* * *
صگر المنايه إو صگر إصگور الشوس...يوم الملاحم
إبصفگ السمر يرتاح وإبرن الطوس...ينتعش غانم
إتگوم الملازم والتكردس كردوس...لو صرخ هاشم
والحـرب لو عسعس...والرمگ تتداهس
الفارس إبعزمه...ينتعش جسمه
إو يبتهج دلاله...والنصر يبراله
* * *
يرتجز بالحومه إو عله راسه إيحوم...طير السعاده
ومن ألأجل نفذ عليه المرسوم...بإسم الشهاده
ما فتر عزمه إو لا ضعف من الگوم...لاچن إراده
ينصرع بالحومه...وإيتِخلّد يومه
هـاك إخذ تاريخه...إو شوف مريخه
يزهر إبأفعـاله...والنصر يبراله
* * *
