ليله الولـدها من تتمثله...وإمهلهله
إو شدت گلبها عله...سرج المهر
* * *
ليله إلولدها إعتنتله إبنشد...وإبعاطفه
إو نادت إيهونك عساها إبرشد...نية الوفه
يا ثمر گلبي إو يريع الچبد...يموالفه
إوياك الموادع يالأكبر حله...وإمهلهله
إو خل أبخ گلبك إبماي الصبر
* * *
يبني أرد أخبرك إبحـالي إشجره...إو شتحملت
إوعيني إبرباك إشكثر ساهره...يبني إو چنت
أنظر الطالعك وأتصوره...وإتأملت
إو هـذا يـوم الچنت أتأمله...وإمهلهله
وأنعم إعيوني ينعم الذخر
* * *
صد عله أُمه الولد صدة ورع...حي ضـامره
إو صورة محمد تنور إو تشع...من منظره
إو ساعده إو صارمه إو زر الدرع...من حيدره
إو جوده من عمه الحسن منهله...وإمهلهله
وإمن الحسين السعد والنصر
* * *
إو من گمر هاشم جمـال الوفه...إبحسنه إنفرد
إو زورد الهواشم إبحد مرهفه...إو بذل الجهد
إو گلب التحشم إستر وإكتفه...إبعزم الولد
يا هله صاحت أُمه ميّة هله...وإمهلهله
يولدي إلما عز علي العمر
* * *
يبني إو شفتلك محاسن بعد...وإتلـوگ إلك
ساعة الچنت أهز بيك المهد...وأتمثلك
شفت الفراسه إو معاني السعد...تتأملك
تنشأ إو تمضي إبعهد كربله...وإمهلهله
كربله هذي وأتجله ألأمر
* * *
يمي عد وجهچ لسرلچ گلب... بس هودي
وأنعم إعيونچ إبيوم الحرب...وأرضي الثدي
يالتحشميني إولدچ ميعگب...وإتجلدي
شـان المعرّب يلازم هله...وإمهلهله
إبصكة البيض إو صليل السمر
* * *
أدري يمعرب إبسهم النسب...يمضي إو تصـل
وأدري متضيع الثديك تعب...حر إو نفل
وأدي المگدر إبيوم الكتب...ما ينفصل
لو شفت عيني إبدمعه هامله...وإمهلهله
يبني لفراگك يضيگ الصدر
* * *
يصعب إفراگك علي يولدي...إو ريحانتي
وإشلون أگضي الحياة إوحدي...يا غربتي
يمّي إبعظيم الصبر هوّدي...وإبغيبتي
ظلي غريبـه إو هظم حامله...وإمهلهله
ذخرچ إبفگده ذخرلچ أجر
* * *