شبيه النبي ألأكرم صلى ألله عليه وآله وسلم
«مجرشه مذيله»
صـورة محمد تظهر...بألأكبر
جبريل ظـل يتمثله...من شاهد إبطف كربله
تظهر معاجز حيدر...بألأكبر
* * *
درعين ألأكبر للجهد زرها إبعزم سلطانه...إيمانه
إول درع من الزرد ثاني درع عنوانه...إيمانه
وإعله المهر شد وإستعد وإتشعشع إبميدانه...إيمانه
إو شد عله الصـارم ساعده...وإتطشر إبحد والده
إو ثگل الحرايب زمه...بالهمه
إو دار الحرب دورة فلك...وإتشاهد إعييون الملك
همـة الفتحت خيبر...بالأكبر
* * *
شد عله الصارم ساعده إو زم الرمح وأسراره...وأخطاره
إو بالطف وصيف إمهنده دگ صافرة إنذاره...وأخطاره
إو زحف الحرايب حدده وإتكهرب إبتياره...وأخطاره
إو خله الحـزم متطشره...إو خله الزلم متحيره
إو تمتثل أمر الصارم...وإتسالم
مرسوم حيدر صـدره...دم الضلاله إيفجره
وإبكربله يتفجر...بألأكبر
* * *
من عرف جايز بالـوغه ممشه المرح يحلاله...حي فاله
للدرنگ إبسيفه أدمغه إو جسّم عليه آجاله...حي فاله
خله المعارك فارغه بملاعب الخياله...حي فاله
إو چم عمـرو بن ود أنحره...وچم مرحب إبسيفه إشطره
مثل علي إو حملاته...إبسطواته
قايس يالتقيس الطعن...للشرك شوف إشچم حصن
بالغاضريه إتكوّر...بألأكبر
* * *
للكوفه خلاها إبّحر روجه تغمر الروجه...شيفوجه
وإبماي إلي إتفايض خطر همة علي ممزوجه...شيفوجه
إو بكر إبن غانم ما گدر يدرك حياته إبروجه...شيفوجه
وإبن الحسين إتنحره...وإصرعه إو حزه إلمنحره
والراس جابه العوده...وإبزوده
وإبهالفراسه الماهره...وإبهالفتح والسيطره
گلـب الحسين إستبشر...بألأكبر
* * *
إمعرس عله غيد الحرب إو گلبين إليزفنه...إيبارنه
إو رمي السهام إشما يصب عألأكبر إيشگفنه...إيبارنه
گلب أبو السجاد إو گلب زينب إبدمه إتحنه...إيبارنه
إو گلب أُمه من نار الوجد...طاير إبجنحان الفگد
وإيضمد إبطبراته...إو طعناته
وإشما هالگلوب إشگفن...عن الطعن وإيضمدن
رمي السهام إتكاثر...بالأكبر
* * *
وإبصارم ألأزدي إنصرع إو خضب معاني الهمه...من دمه
وحسين إجاه إو ما جزع إو مخ المطشر لمه...من دمه
وإتمدد إبكتره إبورع إو حبّه إبوريده إو شمه...من دمه
ناده يشبه المصطفه...عگبك عله الدنيه العفه
روح إخذ چاس ألأوفر...من حيدر
إو عفـّر وجنتـه إيوجنته...شمه إو نشغ من طبرته
دم المسچ والعنبر...بالأكبر
* * *
