سدر شبل حسين الغاره...وراواها الموت إبّتاره
* * *
شبل حسين للحـومه وردها...وحنظل خله عدوانه وردها
إبحد السيف سدرها وردها
كوّرها وطشها ولم بيها
* * *
شبل حسين شع بالكون ناره...وگلب الحرب وجر بيه ناره
بضرب السيف راس الحرب ناره
غط رمحه وشال الملزومه
* * *
من حيـدر حفظ بالحرب سره...وإبحجر الوغه منعگد سره
الگلب حسين بالميدان سره
وإعيون الكون إمبچيها
* * *
آجال الوغه إبعساله ينها...سيفه اليامر وعساله ينها
طيّر نوعها وحط بيها ينها
هجت ما تعرف منواها
* * *
بأبن حسين كسر الگلب يبره...آيه إمهنده وبالروس يبره
وملك الموت وي الرمح يبره
لو زر ما يخطي إبنيشانه
* * *
كورها وردمها وحاس بيها...غشاها الموت ما ظل حاس بيها
خرسه إملجلجه ولا حاس بيها
جفّلها وظلت مرعوبه
* * *
ما ظلت بعد للگوم يرعه...شياه وصار بيها ألأسد يرعه
كلما تجرع إمن الموت يرعه
سدرها وصاح إبتاليها
* * *
إظلّم الكـون وإبن حسين هلهل...وصفگله الرمح والسيف هلهل
إمن اشفاره تكت إسموم هلهل
وتحرج كل طاير نيرانه
* * *
جِسَم بالسيف كـل حرّان ورده...كل جيدوم صار الموت ورده
روضة حيدر ولحسين ورده
شمعة شبان أهل النيبه
* * *