زهرة من حديقة النبي (صلى ألله عليه وآله) ـ ألأكبر
«موشح»
لاح سرج أم الفخـر خيالها...دمر الخيل إو چدسها إو جالها
* * *
دمر الخيل إو چدسها إو حاسها...سلب سطواها إو عزمها إو باسها
ذل طواغيها إو فرس فراسها...حي ألأكبر والملازم شالها
* * *
صال ألأكبر وألحرب وج ناره...إو گام بالروس إيحصد بتاره
للنجاة الگوم لكدت غاره...إمنين ما تجبل الموت إگبالها
* * *
والرمگ تتعثر إبروس الزلم...عالجثث تسحگ إو تسحب باللجم
إتشوف من عگب المراجل والعزم...غدت تجفل من تشوف إخيالها
* * *
جفلت إحيود الزلم وإلكل تصيح...الغوث يا شبه النبي الهادي الفليح
وللنجاة النظر من عدهم شبيح...إمنين متفر ألأمل بذيالها
* * *
فرت الشجعان مختلفه الشعور...حام بيها وأصگر إچبود الصگور
ظنت إبهاليوم لن يوم النشور...إتساوت أرض العاليه إوي إجبالها
* * *
بطش بيها إبن النبي سيد ألأبطاح...سيفه عزرائيل أخذ كل ألأرواح
إو صوت إسرافيل چن بالصور صاح...گامت إو عرضت عليه أعمالها
* * *
ظنت الفرسان كل هذا السدر...حيث ألأكبر كبّر وبيها زجـر
چالعذاب الهون عالگوم إنحدر...والزلم ظنت دنت آجالها
* * *
غصن لاچن فرعـه من دوحة الجود...نفل للعز والفخر والمجد طود
رد لبوه متنومس إو چاسب الزود...إبذل فراعين الحرب وإرجالها
* * *
ناده يا بويه العطش چبدي إنفطر...والحديد أضهدني والظهري كسر
يا علي ناداه من چبدك أحر...چبدتي إو زيدت يبني إشعالها
* * *
يا شبيه المصطفه سيد الـوره...يا چبد حيدر إو يا ضي ناظره
بالخلد يسجيك جدك كوثره...للوغه رد وإستعد لنزالها
* * *
لأمر أبوه إمتثل عالموت إستعد...إتعادل إعله السرج وإتچنه ألأسد
هاشمي وإبغرته إيلوح السعد...ورايته العز والنصر يبرالها
* * *
محتزم رد للحرب وأسعر النار...إو ثار عج إخيولها إو سد ألأقطـار
والشمس كسفت إبرابعة النهار...وبزغ وجه إبن الحسين إبدالها
* * *
شع شعاع الشمس لاچنه گمر...لچن من زور العزم ضيه حمر
يحي چوچب ليل عدنان ومضر...والبني هاشم جبين إهلالها
* * *
