حنين ليلى أُم علي ألأكبر عليهما السلام
عله جثة ولدها إتحوم ليله...وإتصيح وتنابي العقيله
يا ثمر گلبي ويا دليله...إمطبر إو طبراتك ثجيله
جرح إبجرح دمك وشيله...وإصواب فدك نالي حيله
يا نور قنديل الجبيله...دمك نمن إعيوني مسيله
إتمنيت تحضرني عليله...ونعشي عله إمتونـك تشيله
إتراب الگبر بيدك تهيله...وگلبي بعد مينام ليله
وبس ملتهي إبنوحه إو عويله...مال الزمان إشلون ميله
فارگ المحبوب إو خليله
* * *
طبت الخيمه إبگلب مسچوب...تسأل من المعبود وإتلوب
إو تدعي الولدها إبدمع مسچوب...وإتصيح يا علام الغيوب
تعلم إبلبي بيش مصيوب...صبر دليلي إبصبر أيوب
يا راد يوسف لعد يعگوب...ردلي علي إمن المعركه إنّوب
هذا العليّه چان مكتوب...والحزن يتفصل علي ثوب
إو من عگب خـدري إلچان محجوب...أمشي إبيسر وأگطعله إدروب
* * *
إشحال الوالده التفگد ولدها...إبجمر الحزن يتحمس چبدها
وإتعالـج من إصواب إللي ضهدها...إشحال المسعده الفگدت سعدها
تجر حسرة وسف تصفج بيدها...إشحال الفاجده تمسي وحدها
وإلتمسي دارها حفرة لحدها...وإلما تجد وليان عدها
وسهم الشماته إللي مردها...تظل إبوجد ما يهفت وجدها
ثكله إو والها إوتايه رشدها
* * *
