الركب الحسيني يتجه نحو العراق:
ظعن احسين عن (الحرم) رزم...وانوه على العراق ابخطر وهتم
تحير شبل فارس بدر وحنين...ما يدري ينوَّي الوجه لاوين
من الحرم يطلع خايف احسين...اوكلمن يطب خايف ليه يسلم
شال الظعن يوم الترويه اوسار...اوبيه احسين بس ايدير الأفكار
ما ينزل ابدار اويمد عن دار...اله اوعالنبي يحيى ايترحم
تم يسري وهوه اعلى هالحال...لاجن ابوجل قلبه اعلى العيال
لنه من بعيد ايشوف ذلال...عرَّضله اوعليه احسين خطم
راد ايناشده اشعنده امن الاخبار...اوبالكوفه اعلى بن عمه اشجره او صار
من شافه اشتمر عن دربه اوسار...حس قلبه اوضميره اشتعل وأضرم
لاجن عرَّضوا للراجب اثنين...من مكه اطلعوا من بعد الحسين
وقفوا ناشدوا عن جيته امنين...جاوبهم امن الكوفه او أكظم
قالوله اشلون الناس بيها...اوياهو اليامر اوينها عليها
قاللهم لفه ابن ازياد ليها...اوقتل هاني ابن عروه اوقتل مسلم
اومسلم قاموا ايسحبون جثته...اوهاني اوياه يسفح دم رقبته
هذا اللي ابعيني اهناك شفته...اومن بعدي اشصار الله يعلم
بجو حين اسمعوه اوصار همهم...لبو السجاد يصلون ابعلمهم
حته لو يخبروه اوسمعهم...يرد بالظعن ومن القتل يسلم
وصلو ليه اوصاحو يبو اليمه...لفينه ابخبر نحجي يو نضمه
تفكر لخوته اولولاد عمه...قلهم ما عليهم خبر ينظم
قالوله اودمعهم قام يهمل...شفت الراجب اللي جان مجبل
نشدناه اوخبرنه ابمسلم اجتل...وابن زياد بالكوفه ايتحكم
سجب دمعه اوصاح اوجذب ونه...وسافه اعليك يا راعي المحنه
صارت من اخوته اعليه حنه...والنسوان عجت بالمخيم
غدت تلطم حميده اعليه وتنوح...اوتون مثل الحمام اليون بالدوح
وسافه تنجتل مظلوم وتروح...يبويه اومن زغر سني اتيتم
سمع ونها الحسين اوحن عليها...اوغده اينادي يزينب سكتيها
يخويه قطعت قلبي ابحجيها...يتيمه واليتم عالطفل يزحم
صفق ايد اعلى ايد اوصاح هضمه...مسلم ينجتل ويروح دمه
عاين لخوته اولولاد عمه...اوقام احسين وياها ايتكلم
التفت لولاد عمه اول ابعينه...اوقاللهم خذت منكم العينه
قوموا اوردوا لديار المدينه...كفاكم قتل مسلم يا بني العم
انتخوا حين اسمعوه اوقاموا الكل...سلو بيضهم والدمع يهمل
اشلون انرد يعزنه اومسلم اجتل...اوجتاله ابهوا يبقه ايتنعم
لا واللي طبر مرحب وابن ود...عن هالوجه ما نترك ولا نرد
نريد الثار خاف الثار يبعد...يبو السجاد بينه الهضم وسم
بعد هيهات نسدر للمدينه...اويذهب ثار مسلمنه امن ادينه
يبو اليمه اشتقول الناس بينه...اوتدري الناس تنقل مدح يو ذم
رد عاين لخوته اوصاح يكرام...انعكس امري اوصار الخطر جدام
مني ما عليكم حرج وذمام...اليريد ايروح خل يرشد اويسلم
من سمعوه قاموا ليه اخوته...لا جنهم ابكثر الهضم موته
نرد والثار أبو طاهر نفوته...لا واللي هوه ابسيف ابن ملجم
يبو السجاد عنك نرد لاوين...حته انعيش بعدك يا ضوه العين
انته الروح واحنه الجسم يحسين...اوريت الجسم عقب الروح يعدم
قوم أرشد ابنيتك وين متريد...يبو السجاد وأقطع درب البعيد
لا حو على الخيل اونحرو البيد...لا جن بالقلوب النار تضرم
