أضف الموضوع
الشاعر المرحوم الشيخ كاظم منظور الكربلائي
03/09/2019م - 2:11 ص | عدد القراء: 2122
 كاظم منظور الكربلائي
يمّه ذكريني( 1)
«شيعتي»
يمه ذكريني...من تمر زفـّة شباب
إمن العرس محروم...حنتي دم المصاب
شمعت شبابي...من يطفوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
بزغ من برج المخيم جاسم ونوره إيتشعشع
ناشر إجعوده إعله متنه إو مثل طير الجنه يلمع
هلهلت رمله وتگله هاك إخذ گلبي إلمگطع
شنهي يجاسم نيّتك...فاير إبجمرة همّتك
چنك وفيت إبرگبتك...صاح أريد أوفي المرضع
من ثـدي النيبه...راضع إبصافي الحليب
وإبهالشهاده...صار إلي قسمه ونصيب
حوفتي إبدمي...خل يفرشوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
هالله هالله إشلون فزعه من فزع جاسم العمه
ضاگت إبعينه الوسيعه والوفه إيطشه ويلمه
إتنومست رمله إبولده حنت ضلع الصبر يمه
صاحت النيه راشده...گلب أمك ألله إيسـاعده
صاح إلّيوصّيه والده...عالوصيه إيبيع دمه
وأهلي وصوني...بالوفه يوم الطفوف
من دم وريدي...يصبح إخضاب الچفوف
هذي وصيتي يالتسمعوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
إهنا يهل غذيت روحك من ثمر روحي وحليبي
من نصيبك هالشهاده واليسر يبني نصيبي
بالجهد بيضلي وجهي يا ضوه إعيوني وحبيبي
ناداها ليصيبچ رُعب...جدميلي لامات الحرب
والنايبات إشمـا تصب...إدعي والصار إو وجيبي
والوفه شانه...ينعدم بيها الوجـود
إو آنه وجداني...يغتنم جنة الخلود
إو نيّتي إبديوان جدي إكتبوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
ضمته إبصدر المحنه وإنطبع رسمه إبصدرها
تشم ريحانة جماله إو تكف دمعتها إبصبرها
إو ذكرت أيام الرضاعه إو لوجت الروح وسهرها
صاحت إشوصاك الحسن...يا منوتي ونعم المضن
هاك إلبس إثياب الچفن...يا أمل رمله وذخرها
يوم المبارك...أصبح الديني شهيد
وأفـزع العمي...من يظل بالطف وحيد
إو رمله بمصابي...خل يواسوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
يمه حاسبني ضميري إوشفت مگصود اليريده
والضمير إيريد مني أتخضب إبدم العقيده
واليريد الغانمات إعله الطعن يعرض وريده
صاحت إلنيه راشده...نيتي إويه نيتك واحده
إو جاسم سفر عن ساعده...إو سيف أبوه الحسن بيده
صـاح أنه إبديني...ملتزم فرع وأصول
أفدي وجداني...وألأجر عند الرسول
وأُمي الزهره خل يهنوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
لزمت الدلال بيد إو إيد بيها إلزمت ريعه
نادته ودّعك عندي الحسن يمدلل وديعه
اليوم چنك ضيعتني وضعت مني إشلون ضيعه
ناداها يمي إتيتمت...وإبحجر عمي إترعرعت
رباني واليوم إنشأت...والربايـه اليـوم أبيعـه
دهـري يتنمي...وإلتزم عمي إبرباي
ما أعز منه...مهجتي وروحي ودماي
وأُمي إبمُصابي خل يفجعوها
حنـِّتي دمي...والچفن ذاري التراب
يمه ذكريني...من تمر زفـّة شباب
* * *
(1) هذه القصيدة لا توجد في الدواوين السابقة (فقط المستهلات موجوده).
|
