لمثل هذا اليوم إدّخرتك يا ولدي
«ميمر»
يردونه يردونه...والولد يردونه
للحرب والغارات...وإبظلام الشدات
والولد يردونه...شمعه وإيعلگونه
* * *
شان الحمايل بألأنساب إيفحصون
منجم ولـدهم حتى يلزم حدهم
إو عالموت لو رادو عمامه إيكدون
إيكد إبمكدهم...ميعگب عن كدهم
إو بالثمر لو رادو هله يتهنون
ريحانـه عدهم...بالشباب العدهم
إيشمونه إيشمونه...ورده وإيشمونه
بالورد مثلناه...والشباب إشمحلاه
ورده وإيشمونه...شمعه وإيعلگونه
* * *
والولد لو مثل عمامه إو گومه
ينشكر جهـده والسعاده إبجهده
شد يبني وإلكد وإستعد للحومه
والگلبي ركـده...والشهاده إتركده
إو عند الحمايل ما تضيع إعلومه
من يوفـي عهده...والشهاده إبعهده
إيشكرونه إيشكرونه...نشمـي وإيشكرونه
من خواله إمعرب...من عمامه إمدرب
نشمي وإيشكـرونه...شمعه وإيعلگونه
* * *
جاسم سمع لمه إو سمع ملفظها
إو ثمّن لفظهـا إو للمحاسن فضها
وناداها روحي النخوتچ عارضها
إبسوگ المنـايه تزهر إبمعرضها
والطاعتچ يمّي علي فارضها
إي والفرضها...والثدي فارضها
إيصفونه إيصفونه...المرضعه إيصفونه
والحليب الصافي...الرضع منه إيوافي
المرضعه إيصفونه...شمعـه وإيعلگونه
* * *
صد لاچن إشصد ما تنشدوني إشصد
لمّـه إو تبسم يا حلاة المبسم
شد إو تخيل چنه حيدر لو شد
عالحرب دمدم...چالحسن لو دمدم
إو كد مثل ألأكبر عالجحافل من كد
جـاسم تغنم...بالحسين إتغنم
بعيونه بعيونه...والغضـب بعيونه
هاشمي إو ما ينجاس...مثل عمـه العباس
والغضب بعيونه...شمعـه وإيعلگونه
* * *
يبني أرد أحلفك بالحجر والمرضع
إو سهر الليالي وإبراباك الغالي
لحسين أريدك من عرينك تفزع
إو ريح لي بالي...والوصيه إبالي
إو لو صكّت البيض إوسمر لا تجزع
تلكد إگبالي...إو موت يبني إگبالي
مضمونه مضمونه...همتـك مضمونه
تنهض إبعزم الدين...تنذبح دون حسين
همتـك مضمونه...شمعه وإيعلگونه
* * *
يبين يجاسم نخوتي إتسلمها
إو گوم إبعزمها إو للحرايب زمها
عيناچ عيناچ إولدچ يردمها
إو رمحـي اليطشها إو على السيف إيلمها
إو كل غانمه إلما يندرك مغنمها
كـون أغتنمها...إو بسمچ أغتنمها
إيربونه إيربونه...والهلـه إيربونه
يلتزم حگ إرباه...والوفه ما ينساه
والهلـه إيربونه...شمعه وإيعلگونه
* * *
فرفر گلب رمله إو يگطع السبّاح
لزمته اللـوجه إو عالشباب إللوجه
إو شافت إبحر الموت جاسم مرتاح
ميهمه روجه...إو صارمه إيصد روجه
صاحت يجاسم خوض بحر الطفاح
وإجهد إبفوجـه...إو بالفراسه إتفوجه
إيعرفونه إيعرفونه...وإبنـچ إيعرفونه
بيـده سيف الگطاع...بالحرب روس إسباع
وإبنچ إيعرفونه...شمعه وإيعلگونه
* * *
