موعدك في الجنة يا ولدي
«مجرشه مذيله»
حنة شباب الجنه...بالجنه
عمّك وحيد إبكربله...سجل جهادك سجله
تلگه العرس والحنه...بالجنه
* * *
يبني يجاسم لا تظل مگيود ذمه إلعودك...وإبزودك
بالسيف رادك تبتهل بالطف تذب مجهودك...وإبزودك
وألأمر عمك تمتثل وإتضحي دونه إوجودك...وإبزودك
إرشد يجاسم نيتك...للحومه وإچسب راحتك
إو خضـب محاسن عمك...من دمك
بالكـون يظهر لك فضل...أقلام الشهاده بالسجل
مجهودك إيسجلنه...بالجنه
* * *
خليني أزر درعك وأشد سيفك النصرة عمك...ماني أُمك
غانم عسه إبنية رشد للحرب تجلي همك...ماني أُمك
خل يظل جرحك بالچبد وإيفور دمي إبدمك...ماني أُمك
سلمت للبـاري ألأمر...عگبك يسليني الصبر
صوبني سيف الصـابك...بمصابك
لو أثر إبگلبي الحـزن...وإيظل عله إفراگك يون
گلبي يبطل الونّـه...بالجنه
* * *
صد الولد لمّه إو شرع رمحه إو نـده شوفيني...تدريني
شاله العزم شع وإنتشع عونچ يالتحشميني...تدريني
ما أفزع إبيوم الفزع ثابت النصرة ديني...تدريني
وإبريجي أحله إمن الشهد...چاس الشهاده والسعد
رفّت عله جنحانه...بجنانه
هاي النعيم المثمره...هذا ألأمير إو كوثره
خلي إولدچ يتهنه...بالجنه
* * *
صاحت يسباح الگلب يبني إو ينور إعيوني...خلوني
ولهانه ما شوف الدرب وإبيومك إيفجعوني...خلوني
بس رادتي إبيوم الحـرب يبني تصدگ إظنوني...خلوني
وأگضي الليالي الساهره...وأرعه النجوم الزاهره
وإبغيبتك يرعاني...إيماني
هاك إخذ وياك الچبد...وإبمصرعك خل ينمرد
إو خل ياخذ إشيتمنه...بالجنه
* * *
صد إلها والصارم جدح نار إبعزم نخواها...إو حياها
والگلب يتطاير فرح من إغتنم مرضاها...إو حياها
عن العرس جاسم صفح إو للغانمه إتعنـاها...إو حياها
رمله إبولدها إستبشرت...وإبشرف جهده إتشرفت
شـوف الحليب الصافي...شيوافي
خله الولد وأم الولد...تتهنه وإتنام إبرغد
إو ثـدي الترعرع منه...بالجنه
* * *
مرضع الصافي من الدنس ينعش الشبله وجوده...وإبزوده
وإيجاهد الگطع النفس للدين حد مجهوده...وإبزوده
خلعة شرف جاسم لبس والشرف من معبوده...وإبزوده
سجل صحيفه إمن الهمم...دونها باللوح القلم
إو يشهد محمد بيـها...إو ماضيها
جاسم مراسيم الچتل...أدّاهن إو عند الرسل
مثل الگـمر وضحنّه...بالجنه
* * *
