يبني الضيعتني إبضيعتك مني...دوهني زمـاني بيك دوهني
* * *
دوهني زماني إو تـاه مني الراي...يلب إحشـاي يالمنگط من إحشاي
يماي العين عگبك نزل بيها الماي...ظني چان بيك إو خيبت ظني
* * *
ظني خاب يوليدي إو گطعت الياس...يعصابة الراس إلبيك رفع الراس
ينوماس الچسب بالغانمه النوماس...إغتنمتك والمنايه إغتنمتك مني
* * *
المنايـه إغتنمتك مني وبعد هيهات...ترد يبني ويرد ليّه زماني الفات
يسبّاح الچبد عودك تلوّه ومات...وساعات المنايه بيك چادني
* * *
چادني المنايـه إو مالي حيل الچود...حيلي إوياك راح ومن تعود إيعود
يعگل الراس وياك العگل مفگود...سودنّي هوه فرگاك سودني
* * *
سودني هوه فرگاك وإختليت...عله إفراك يجاسم دم دمع هليت
العمد لو طـاح من البيت طاح البيت...وأنه بيتي إنهدم وإعله العمد وني
* * *
أونن وأنتحب واشجي حمام الدوح...وعلّمت الـورگ والدلم فن النوح
روحي إوياك راحت دَ رِد يبني الروح...لمّك آ يروحي شبعدك عني
* * *
عني شبعدك يالبالچبد مرعاك...بأيام الحمل گلبي شكثر باراك
يجاسم من عگب حملك ليالي إرباك...حاربت الرغد والنوم خلّني
* * *
حاربت الرغد يبني ولذيذ النوم...وأهز مهدك يجاسم وأرجه بيك إعلوم
وأدوِّر بيك يوم إو صدگ هذا اليوم...صابني النوايب بيه صابني
* * *
صابني النوايب والسهم جراح...لوه هـرش الگلب وإتگطع السباح
ردت يرتاح گلبي بيك خوش إرتاح...وخوش إذخرتك العازة كبر سني
* * *
الكبر سني ذخرتك يولدي وأرجاك...من تطلع تجيب الموزمه وياك
تسلاني النوايب يولدي وما سلاك...چيف اسلاك وأيامك يّذكرنّي
* * *
أيامك يذچرني وسهمها إيجيس...يشطبة بان يالتتلوه بالرسريس
حسبت إحساب اشوفك يولدي عريس...إو ليالي عرسك إبعرسك يهنني
* * *
تتهنه النفس والعين تتمثل...طولك بين زفافتك يتمايل
وتتسدر إبديـوانك إو تتبهلل...لضيوف التجيك إو بيها متهني
* * *
تتهنه إبشبابك ردت يا مرتوب...ما ظنيت يندار الفلك مگلوب
وأشوفنك يجاسم منصـرع مصيوب...وأصاويبك إبفيض إدماك حنني
* * *
تحنيت إبنجيع إدماك آ يبني...شيبني حريج إرباك شيبني
عله إفراش الـولم ردتك تمددني...وتوسع حفرتي إو بيدك تنزلني
* * *
تنزلني إبگبري والدمع همال...وعلي تربان گبري إبيمنتك تنهال
يجاسم كربله ما چانت إعله البال...فني بطل بيها والنحب فني
* * *
فني النـوح يبني ما تگلي إشلون...گلب لمّك يظل يبني إو تظل إعيون
تصد وتشاهد الشبان يتثنون...فاتني ليالي البيض فاتني
* * *