چالبدر جاسم بزغ من خيمته...وأزهر الميدان إبلمع غُرّته
* * *
چالأسد هاج إمن العرين الشهم...بالنصر مدرع بالعزم محتزم
من گُبل عالجيمان خيل إو زلـم...إتبدل عزمها إبريب من صولته
* * *
دمـدم عله الشوس إو تچنه إو غضب...رجها إو رجنها إو صاح يرده العرب
جدي الصميده إلبيه تزول الكُرَب...نعمين وآنه إبن الحسن ضنوته
* * *
حـاس إو تغطرس وإنعطف عالحرب...ضاري إو عله درعه إرتده للگلب
ألوت العنه إخيول صخر إو حرب...ردت نكس من شاهدت حملته
* * *
حوّم عله الگوم وزبد وإرتعد...وإبغرته إيلوح النصر والسعد
وبصارمه المـوت إنرسم وإنرصـد...وأرواح فرسـان الحرب طاعته
* * *
إبهاشم تچنه الهاشمي وإرتجز...يهل الفراسه وللحرايب برز
گابـل المسكون إو هله إو لا عجز...من حربه لاچن جدمت ساعته
* * *
أدنت منيته إوخـان بيه الدهر...ومن العطش چبده إنعطب وإنفطر
ويلاه وبصارم ألأزدي إنطبر...لا يالعلي وألله غدر طبرته
* * *
من طاح فوگ الترب صد للطنب...إدركني يبو اليمه يعمي ندب
من سمع صوته حسين چبده إنسلب...إو سالت عله صحن الوجن دمعته
* * *
مسرع حضر عنده إو يسح الدمع...يجذب الونه والگلب منفجع
شافه عله وجه الثره منصرع...وبدم وريده إمعفره جثته
* * *
ناده يجاسم كل هلك وإخوتك...شابحه العين إو تنتظر زفتك
وعمّتك زينب زيّنت حوفتك...نصبت إمنصتك والشمع علگته
* * *
فتيان هاشم تود چانت تشوف...عرسك إو من حنتك تخضب الـچفوف
ما درت عريس إو توزعه السيوف...وإخضاب چفه من دمه رگبته
* * *
زمه إعله صدره إو سدر بي للخيم...طلعت تون زينب وتنعه الحرم
من شافته الجاسم إبدمه خذم...دمع البيابي عالوجن هلّته
* * *