ولدي قاسم(1)
«بحر الطويل»
جاسم يا شباب الدين...يبني إو يا ضوه عيني
أريدك تنذبح لحسين...وإبدمك تحنيني
* * *
دگرب خل أشم أورود...خدك وأنسل إجعودك
فگدك والعگل مفگود...مني وهايم إبرودك
وإعلگ يولدي بحدود...عمك شمعة إوجودك
يبني إللي يربـونه...اليوم الضيج يردونه
إو حُر اليوفي إديونه
لتنـام إعله ردن الدين...أوفي حسين توفيني
* * *
صد لمُه الولد بعيون...نار إو نور تتواگد
يهون ألأمر يمّي إيهون...ماني إبنچ وحـامي الحد
إلچ عين التشوف إشلون...أسوي للطعن مشهد
وأمثل حيدر إو زوده...وأظهر للحسن جوده
ولحسين ألزم إحدوده
وأگف وگفة علي بحنين...إلمحمد وأذب عن ديني
* * *
هلهل گلب رمـله وهل...دمعها إبشوفة إهلاله
يروح الروح يا منهل...نمير الگلب وآماله
يا مرتوب يمكمل...بسور الخدر وإظلاله
إبحياتك خـدري يتنظم...إو من ثغرك إبّحر الدم
أدري إبخدري يتهدم
وأعز منك يماي العين...إنتصار حسين يلفيني
* * *
ماني إبنچ وگر عيناچ...هودي من الفزع هودي
ثمر گلبچ نمير إحشاچ...رواني وأنعش إوجودي
إلگطع النفس حدي إوياچ...ما گصّر إبمجهودي
وحگ حجرچ الرباني...إو در ثديچ الغذاني
وأبويه بعمي وصاني
يمّي إو لابـد إتشوفين...لو عمّرت مياديني
* * *
صـاحت هله إبهالنيه...إو هله إبهمة الناويها
روح إچسب مراضيه...العمك وأُمك إرضيها
بيك إجروح مدميه...تصير إو دمعي جاريها
نخبط إدمـاك والحنه...يبني وبيها نتحنه
روح إبجهدك إتهنه
عليك إنرسم بالكونين...وإبتنفيذه هنيني
* * *
عليّه فرضت ألأحكام...شهاده إو كون أ أدّيها
وإشما تخبط ألأيام...بالصارم لصفيها
إچفوف الدين وإلإسلام...من دمي لحنيها
وأشفي گلبچ المهموم...ولي بالغاضريه يوم
يتأرّخ إبفيض إدموم
وأخلِّد شرف بالدارين...وبالفردوس تلگيني
* * *
لوح إبظهر المسفسر...يبني إو عالمخيم طوف
إو هز الرمح وإتبختر...إو خل عين العيال إتشوف
يسكن روعها إوتستر...بيك إو تامن إمن إلخوف
وإعرض للطعن صدرك...وإتحنه إبدمه نحـرك
أمري يولدي وأمرك
نودعه الباري الكونين...يرعاك إو يراعيني
* * *
(1) هذه القصيدة مكررة في الجزء 7 و 9 .
