أجّل العرس يا بُني
«الصدر دارمي + إهجيني»
ها ها يجـاسم گوم...عمّك وحيد اليوم
والعرس ما هو يومه
* * *
ها يبني ها يا موح...عيني ونظرها العـالي
ها يبني ها ياروح...روحي وثمر دلالي
من گلبي تبره إجروح...لو حققت آمالي
وعيني إيهناها النوم...لو شافتك جيدوم
والعرس ما هو يومه
* * *
عند إولدچ محفوظ...حگچ إبطي الهمه
وبالواجب المفروض...روح إولدچ مهتمه
وللغانمه معروض...ذخرچ لنصرة عمه
بالسيف إزيـل إهموم...گلبچ وعيج أللوم
والعرس ماهو يومه
* * *
حگ الربه مريود...وآنه أمك الربيتك
يبني وعليك شهود...من درهن الغذيتك
دلزم لي يبني حدود...وخل إيتشعشع صيتك
يالبوفـه ملزوم...كد يبني وإخذ علوم
والعرس ما هو يومه
* * *
حجر أمك الرباك...ما تعلم إشيتمنه
يريدك بفيض إدماك...تسبح إبحر الجنه
وگلب أمك الباراك...عن عرسك إگطع ظنه
وبالغانمه مرسوم...خضاب الشباب إدموم
والعرس ماهو يومه
* * *
لبنچ إحگوگ إرباه...بالمعركه إيزفنه
يحييهن إمن إدماه...وبدمهن إيحننه
محله العرس محلاه...لو دم تصير الحنه
هاي المنـايه إتحوم...وإتجدم المقسوم
والعرس ما هو يومه
* * *
يحله ويلوگ إعليك...درع الشهاده إمگدر
وبچفك اليرضيك...سيفك ورث من حيدر
من العطش يرويك...جدك إبماي الكوثر
شد يبني عالصمصوم...وتعرض المحتوم
والعرس ما هو يومه
* * *
